قازاقستان پرەزيدەنتى قاسىم-جومارت توقاەۆتىڭ تاپسىرماسى بويىنشا توتەنشە جاعدايلار مينيسترلىگى سۋاعار قۇرىلعىلارى بار «قازاۆياقۇتقارۋ» اق-نىڭ مي-8 امت 2 تىكۇشاعىن جانە قۇرامىندا 16 قۇتقارۋشى بار جەدەل توبىن ورمان ورتتەرىن سوندىرۋگە كومەك كورسەتۋ ءۇشىن تۇركيا رەسپۋبليكاسىنا جىبەردى, دەپ حابارلادى تجم رەسمي وكىلى تالعات ءۋالي.
قازاقستاندىق تىكۇشاقتار وتكەن سەنبىدە ۇشىپ شىقتى جانە ءۇش مەملەكەتتە توقتاپ, ولاردىڭ شەكاراسى ارقىلى تۇركيانىڭ مۇعلا قالاسىنا ۇشىپ جەتەدى. جەدەل توپتى نۇر-سۇلتان قالاسىنىڭ اۋەجايىندا توتەنشە جاعدايلار ءبىرىنشى ۆيتسە-ءمينيسترى يبراگيم كۇلشىمباەۆ شىعارىپ سالدى. ءبىزدىڭ قۇتقارۋشىلارىمىزدىڭ جەرگىلىكتى تۇرىك بيلىگىمەن ءوزارا ءىس-قيمىلىن قازاقستان رەسپۋبليكاسىنىڭ تۇركياداعى ەلشىلىگى ۇيلەستىرەدى.
سونداي-اق قازاقستان ورتەنگەن اۋماقتارداعى ورمان جامىلعىسىن قالپىنا كەلتىرۋگە گۋمانيتارلىق كومەك كورسەتۋگە نيەتتى. وتىرعىزىلعان ورمان قازاق جانە تۇرىك حالىقتارىنىڭ اراسىنداعى دوستىق پەن باۋىرلاستىق بايلانىستاردىڭ سيمۆولى بولادى.
«ەگەمەن-اقپارات»