سەنات دەپۋتاتتارى ايگۇل قاپباروۆا مەن نۇرلان بەكنازاروۆ شىمكەنت قالاسىنا ساپارى بارىسىندا قۇقىق قورعاۋ ورگاندارىنىڭ قىزمەتكەرلەرىمەن كەزدەستى, دەپ حابارلادى وسى پالاتانىڭ ءباسپاسوز قىزمەتى.
دەپۋتاتتار قالالىق ءىىب-دە بولعان كەزدە مەگاپوليس تۇرعىندارىنىڭ قۇقىقتارىن قورعاۋ جانە قاۋىپسىزدىگىن قامتاماسىز ەتۋ جاعدايىمەن تانىستى.
پوليتسەيلەر سەناتورلارعا بەينە باقىلاۋ ورتالىعى مەن پوليتسيانىڭ زاماناۋي ءموبيلدى بولىمشەلەرىنىڭ جۇمىسىن كورسەتتى. ولار قالادا قاۋىپسىزدىكتى قامتاماسىز ەتۋ ءۇشىن 70 بەينەباقىلاۋ قۇرىلعىسى ورناتىلعانىن جانە حالىق تىعىز ورنالاسقان اۋدانداردا 100 ءموبيلدى پوليتسيا ۋچاسكەسىن سالۋ ماسەلەسى شەشىلگەنىن ايتتى.
كەزدەسۋ بارىسىندا قاۋىپسىزدىك قىزمەتكەرلەرىنىڭ ەڭبەك جاعدايىن زاڭنامالىق قامتاماسىز ەتۋ ماسەلەلەرى دە كوتەرىلدى. اتاپ ايتقاندا, قۇقىق قولدانۋدىڭ ءۇش دەڭگەيلى جۇيەسىن ەنگىزۋ جانە حالىققا «قادامدىق قولجەتىمدىلىك» قاعيداتىنا نەگىزدەلگەن پوليتسيا قىزمەتىنىڭ ۇلگىسىن زاڭنامالىق بەكىتۋ تالقىلاندى.
«پاندەميا كەزىندە قۇقىق قورعاۋ ورگاندارى قىزمەتكەرلەرىنىڭ جۇمىسى اۋىرلاعانى انىق جانە قوسىمشا كۇش جۇمسالعانى بەلگىلى. وسىعان بايلانىستى مەگاپوليستە پوليتسيا قىزمەتىن جەتىلدىرۋ جانە زامان تالابىنا سايكەس تسيفرلى سەرۆيستەرگە كوشۋ ماڭىزدى بولىپ وتىر. كارانتين كەزىندە تۇرعىنداردىڭ قيمىل-قوزعالىسى مەن قاۋىپسىزدىگىن باقىلاۋ دا – وزەكتى ماسەلە. سوندىقتان كوشەلەردە بەينەباقىلاۋ كامەرالارىن ورناتۋدىڭ تيىمدىلىگى ارتىپ وتىر. بۇل رەتتە كامەرالىق باقىلاۋ قۇرالدارى ايىپپۇلدار سالۋ ارقىلى جازالاۋ ماقساتىندا ەمەس, تۇرعىنداردىڭ قاۋىپسىزدىگىن قامتاماسىز ەتۋ باعىتىندا كوبىرەك قىزمەت اتقارۋى ءتيىس», دەدى سەناتور ايگۇل قاپباروۆا.
سەنات دەپۋتاتى نۇرلان بەكنازاروۆ ءوز كەزەگىندە ەلىمىز پرەزيدەنتى العا قويعان مىندەتتەرگە سايكەس ازاماتتاردىڭ قۇقىقتارى مەن قاۋىپسىزدىگىن قورعاۋدى كۇشەيتۋ سەناتورلاردىڭ نازارىندا بولاتىنىن اتاپ ءوتتى.