پرەزيدەنت قاسىم-جومارت توقاەۆ قىرعىزستان كوشباسشىسى سادىر جاپاروۆپەن تۇرىكمەنستاندا كەزدەسۋ وتكىزدى. بۇل تۋرالى قىرعىز رەسپۋبليكاسى پرەزيدەنتى اكىمشىلىگىنىڭ حابارلاماسىندا ايتىلعان, دەپ حابارلايدى Egemen.kz.
كەزدەسۋ تۇركمەنباشى قالاسىندا ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋى شەڭبەرىندە وتكەن.
تاراپتار ءتۇرلى باعىت بويىنشا ەكىجاقتى ستراتەگيالىق ارىپتەستىكتىڭ وزەكتى ماسەلەلەرىن, سونداي-اق ءوزارا ءتيىمدى قاتىناستاردى دامىتۋ پەرسپەكتيۆالارىن تالقىلادى. سونداي-اق, كوروناۆيرۋس پاندەمياسى كەزەڭىندە ەكى ەل ازاماتتارىنىڭ شەكارادان ءوتۋ ماسەلەلەرى تالقىلاندى.«سادىر جاپاروۆ قىرعىزستان-قازاقستان ەكىجاقتى ىنتىماقتاستىعىنىڭ قازىرگى بەلسەندىلىگى مەن جوعارى دەڭگەيى تۋرالى ايتتى. ول بۇگىنگى كەلىسسوزدەر ءداستۇرلى تۇردە ەكى مەملەكەت اراسىنداعى ءوزارا قارىم-قاتىناستى سيپاتتايتىن وداقتاستىق قاتىناستار مەن ستراتەگيالىق ارىپتەستىك رۋحىندا وتەتىنىنە نازار اۋداردى», دەدى جاپاروۆتىڭ اكىمشىلىگى.
سونداي-اق سادىر جاپاروۆ باۋىرلاس قازاقستانمەن ساياسي, ساۋدا-ەكونوميكالىق, كولىك-لوگيستيكالىق, مادەني-گۋمانيتارلىق بايلانىستاردى ودان ءارى كەڭەيتۋىنە نيەتتى ەكەنىن ايتتى.
قىرعىزستان پرەزيدەنتى اكىمشىلىگىنىڭ مالىمەتىنشە, قاسىم-جومارت توقاەۆ باۋىرلاس قىرعىزستان مەن قازاقستان اراسىندا شەشىلمەيتىن ماسەلەلەر بولماۋى كەرەك ەكەنىنە توقتالىپ, ءوزارا بايلانىستاردى جالعاستىرۋ كەرەگىن ايتتى.
توقاەۆ جاپاروۆتىڭ ورتالىق ازيا مەملەكەت باسشىلارىنىڭ كونسۋلتاتيۆتىك كەزدەسۋى اياسىندا جاقسى باستامالار كوتەرگەنىن, سونداي-اق, بۇل ۇسىنىستاردى ءتۇرلى حالىقارالىق پلاتفورمالاردا قولداۋعا دايىن ەكەنىن ءبىلدىردى.