سەمەي اۋەجايىندا ولگا رىپاكوۆانى جانكۇيەرلەرى قارسى الدى

ولاردىڭ اراسىندا وليمپيادا چەمپيونى ولگا رىپاكوۆا دا بار. فينالعا ءوتۋ ءۇشىن 14,40 مەتردى ەڭسەرۋ كەرەك بولدى. رىپاكوۆا 13,69 مەتر ناتيجە كورسەتىپ, فينالعا وتە المادى. دەگەنمەن, سپورتشىنىڭ وليمپيادادان العان اسەرلەرى ەرەكشە. بۇگىن وليمپيادا چەمپيونىن سەمەيدىڭ اۋەجايىندا تۋىستارى مەن جانكۇيەرلەرى كۇتىپ الدى.

«وليمپيادا مەن ءۇشىن ءساتتى وتپەسە دە, العان اسەرلەرىم ەرەكشە. ۇيىمداستىرۋ جاعى ۇنادى. سپورتشىعا جەتپەيتىن جالعىز ءجايت بايقالدى. ول شىنايى كورەرمەندەردىڭ بولماۋى. جاپون حالقىنا الەمدەگى جاعدايعا قاراماستان وليمپيادا ويىندارىن لايىقتى وتكىزگەنى ءۇشىن راحمەت. قازاقستاندىقتاردىڭ قولداۋى الەۋمەتتىك جەلىلەردە دە, جاڭالىقتاردا دا سەزىلدى. بارلىق جەردە جاعىمدى تىلەكتەر مەن وڭ پىكىرلەر ايتىلىپ جاتتى. وليمپيادا ويىندارى مەن ءۇشىن ءساتسىز بولعانىمەن, شىنايى جانكۇيەرلەردىڭ قولداۋلارى ەرەكشە شابىتتاندىردى. بارشاڭىزعا ءدان ريزامىن», دەيدى ولگا رىپاكوۆا.

سپورتشى سونداي-اق, وليمپيادانىڭ اشىلۋىنا قاتىستى تۇسىنىكتەمە بەردى. ونىڭ قازاقى كيىممەن تۋ ۇستاپ شىققان بەينەسى شەتەلدىكتەردىڭ تاڭدايىن قاقتىرعان. رىپاكوۆانىڭ ايتۋىنشا, مۇنىڭ ءبارى ستيليستتەر مەن ديزاينەرلەردىڭ ساتتى ەڭبەگى.

«مەنىڭ بۇل بەينەمدى كورگەن شەتەلدىكتەر وتە ەرەكشە اسەردە بولدى. الەۋمەتتىك جەلىلەردە وڭ سيپاتتاعى پىكىرلەر كوپ جازىلدى. مەنىڭ بەينەمە ۇقساس كەيىپكەرى بار كومپيۋتەرلىك ويىندار بار ەكەن. سوندىقتان جاپوندىقتاردىڭ, كورەيلەردىڭ, ءتىپتى قىتايلىقتاردىڭ ارەكەتى وسىلاي بولعان. مەنىڭ ويىمشا, بۇل تۋ ۇستاۋشىلاردىڭ جارقىراپ شىعۋىنا ۇلەس قوسقان ستيليستەردىڭ, ديزاينەرلەردىڭ, ۇلتتىق وليمپيادا كوميتەتىنىڭ تىكەلەي ەڭبەگى. ولار ءبارىن جوعارى دەڭگەيدە جاسادى», دەيدى ولگا.

الداعى ۋاقىتتا سپورتشى دەمالۋدى جوسپارلاپ وتىر.

«مەن ءالى الداعى ۋاقىتقا جوسپار قۇرعان جوقپىن. مەنىڭ ويىمشا, ءبىراز دەمالىپ, قالپىما كەلۋىم كەرەك», دەدى سپورتشى.

ولگا رىپاكوۆا – قازاقستاندىق جەڭىل اتلەت, لوندون وليمپياداسىنىڭ چەمپيونى (2012), بەيجىڭ وليمپياداسىنىڭ كۇمىس جۇلدەگەرى (2008) جانە ريو-دە-جانەيرو وليمپياداسىنىڭ قولا جۇلدەگەرى (2016).