ورىس كومپوزيتورى س.پروكوفەۆتى شابىتتاندىرعان ۋ.شەكسپيردىڭ «رومەو مەن دجۋلەتتا» اتتى شىعارماسى الەم جۇرتىنىڭ رۋحاني قازىناسىنا اينالعان عاجاپ دۇنيە. ءيا, بۇل ۋ.شەكسپيردىڭ مۇڭدى ماحاببات جىرى. «ماحاببات» اتتى عاجاپ سەزىمنىڭ يەسى بولعان ەكى جاستىڭ ءومىرى. بۇل شىعارما حح عاسىردا الەم تەاترلارىندا كوپ قويىلعان بالەتتىڭ ءبىرى.
ورىس كومپوزيتورى س.پروكوفەۆتى شابىتتاندىرعان ۋ.شەكسپيردىڭ «رومەو مەن دجۋلەتتا» اتتى شىعارماسى الەم جۇرتىنىڭ رۋحاني قازىناسىنا اينالعان عاجاپ دۇنيە. ءيا, بۇل ۋ.شەكسپيردىڭ مۇڭدى ماحاببات جىرى. «ماحاببات» اتتى عاجاپ سەزىمنىڭ يەسى بولعان ەكى جاستىڭ ءومىرى. بۇل شىعارما حح عاسىردا الەم تەاترلارىندا كوپ قويىلعان بالەتتىڭ ءبىرى.
بالەت العاش رەت قازاقستان ساحناسىندا يۋ.گريگوروۆيچتىڭ قويىلىمىندا اباي اتىنداعى اكادەميالىق وپەرا جانە بالەت تەاترىندا ىسكە استى. ەندى وسى بالەت ەلورداداعى «استانا وپەرا» تەاترىندا قويىلىپ, كورەرمەندى ءدۇر سىلكىندىردى.
بۇل بالەتتى ءار كەزەڭدە دجون كرەنكو, كەننەت ماكميللان جانە رۋدولف نۋريەۆ قويعان ەدى. ال وسى جولعى سپەكتاكلدى بەلگىلى بالەتمەيستەر شارل جيۋد قويدى.
دجۋلەتتانى ورىنداعان گاۋھار ۋسينا شىعارماشىلىعى ءپىسىپ, جەتىلگەن قانداي بولسىن كۇردەلى پارتيالاردى ءوز دەڭگەيىندە الىپ شىعا الاتىن ءبيشى. سپەكتاكلدىڭ ءبىرىنشى بولىمىندە بالالىق جارقىن مىنەزدى گاۋھار – دجۋلەتتا, ەكىنشى بولىمدە ماحابباتى ءۇشىن قاندايدا بولسىن شەشىمگە باراتىن, جانۇشىرا سونىڭ جولىن ىزدەگەن تراگەدياعا تولى بەينەنى كورسەتتى. دجۋلەتتانىڭ رومەونى كورىپ, عاشىقتىق وتى جالىنداعان ىشكى سەزىمىن اياق ۇشىنداعى ۇساق قيمىل (pas suivi) ارقىلى, قوس قولدىڭ قاراپايىم قيمىلى ارقىلى ورىنداعاندا جۇرەك ءلۇپىلى مەن جان تەبىرەنىسىن كورەرمەنگە جەتكىزەدى.
ال, ايگەرىم بەكەتاەۆا سومداعان دجۋلەتتا بالا مىنەزدى, وڭ-سولىن تانىپ بىلە قويماعان, كۇتۋشىسىمەن تالاسا ويىن ويناپ جۇرگەن اڭعال جاندى كورسەتە الدى.
وسى سپەكتاكلدەگى ءبيشىلەردىڭ ىشىندە ورىنداۋشىلىق شەبەرلىگىمەن كوزگە تۇسكەن دوسجان تابىلدى بولدى. ول ءور مىنەزدى, نامىسىن قولدان بەرمەيتىن جىگەرلى جان ءتيبالدىنى سومدادى. ءبيشى ىشكى جيناقىلىعىمەن, كلاسسيكالىق بي قالىپتارىن ناقتى, تازا ورىنداۋى ارقىلى كەيىپكەرىنىڭ مىنەز-قۇلقىن بارىنشا اشتى.
بالەت ونەرىنىڭ تەحنيكاسىن جوعارى دەڭگەيدە مەڭگەرگەن ورىنداۋشىلاردىڭ پلاستيكالىق ەركىندىكتەرى كۇردەلى وبرازداردى اشۋدا ۇلكەن مۇمكىندىك بەرگەنى كورىنىپ تۇردى.
سپەكتاكلدە كوردەبالەتتىڭ الار ورنى ەرەكشە. ۆەرونا قالاسىنىڭ الاڭىنداعى ۇرىس-كەرىس, ايقاي-شۋ توبەلەس ەكى توپتىڭ ءبىر-بىرىنە تاپ بەرە ورىندالاتىن سەكىرىس, جۇگىرىستەر ارقىلى بەينەلەنسە, بالداعى كوپشىلىك بيلەر اقسۇيەك جانداردىڭ اسىقپاي جىلجي اياق تاستاۋ ارقىلى كورسەتىلگەن. ال, دجۋلەتتانى جەرلەۋ شەرۋى قارا كيىم كيىپ, شىراق ۇستاعان قالىپتا جاي جىلجۋ ارقىلى بەرىلگەن. وسى كوپشىلىك ساحنالار سپەكتاكلدەگى جەكە وبرازداردىڭ سان قىرلارىنىڭ اشىلۋىندا نەگىزگى پسيحولوگيالىق جۇكتى كوتەرۋشى كۇش. ەكى قارسى توپتىڭ كوپشىلىك ساحنالارى ءوزىنىڭ پلاستيكالىق ىرعاقتى, پسيحولوگيالىق بوياۋلار ارقىلى شەشىلگەن.
بالەتمەيستەر وسى مۇڭدى ماحاببات يەلەرىنىڭ ءومىر سۇرگەن ورتاسىن كورسەتۋدە ءساتتى كورسەتىلگەن سۋرەتتەمەلەرىن دجۋلەتتانىڭ ولىمىمەن بايلانىستىرعان. دجۋلەتتانىڭ دەنەسىن كوتەرىپ تۇرعان اكەسى, ەكى جاعىندا باسى مەن اياعىن قۇشقان اناسى مەن كۇتۋشىسىنىڭ قالپى, رومەونىڭ دجۋلەتتانىڭ جانسىز دەنەسىن ارقاسىنا سالا جوعارى كوتەرىپ بيلەگەن بيىندەگى كەيپى شىركەۋدىڭ ايقاستىرىلعان (كرەست) بەلگىسىن بەرگەندەي.
«استانا وپەرا» تەاترىنىڭ بالەت ترۋپپاسى ءوزىنىڭ جاستىعىمەن ەرەكشەلەنەتىن ۇجىم. وسى ۇجىمنىڭ كاسىبي شەبەرلىگىنىڭ شىڭدالۋىندا دۇنيەجۇزىنە بەلگىلى بالەتمەيستەرلەرمەن جۇمىس ىستەۋ بەلگىلى ءبىر دەڭگەيدە ءوز ناتيجەسىن بەرگەنى ءسوزسىز.
ءسويتىپ, «استانا وپەرا» تەاترىندا س.پروكوفەۆتىڭ «رومەو مەن دجۋلەتتا» بالەتى ۇلكەن تابىسپەن ءوتتى.
بي ونەرى كوپقىرلى. سوندىقتان دا, وسى جاس تەاتر بالەت ترۋپپاسىنان ءالى دە تالاي قىزىقتى قويىلىمدار كۇتەمىز.
تويعان ءىزىم,
قازاقستان رەسپۋبليكاسىنىڭ ەڭبەك سىڭىرگەن ءارتىسى,
ونەرتانۋ كانديداتى.