«تاكسيشى جوعالدى» دەگەنگە جۇرت ەلەڭ ەتە قالادى. ويتكەنى وسى كاسىپتىڭ ادامدارىنا انە ءبىر جىلدارى ءجيى قاستاندىق جاسالىپ, ءولى دەنەلەرى ءجيى تابىلاتىن. بۇل جولى دا سونداي وقيعا ەمەس پە ەكەن دەپ پەتروپاۆلدىق ءتارتىپ ساقشىلارى ورە تۇرەگەلگەن.
ونىڭ ۇستىنە, جەرگىلىكتى تاكسي پاركىنىڭ 45 جاستاعى جۇرگىزۋشىسى بۇرىن جوعالىپ كەتۋ سياقتى قىلىق كورسەتپەگەن, سالماقتى ادام ەكەن. ايەلى ءۇش كۇننەن بەرى ۇيگە كەلمەدى دەگەن سوڭ پوليتسيا قالا اۋماعىن, ونىڭ ىشىندە ساياجايلاردى سەكتورلارعا ءبولىپ, بىرنەشە توپپەن ىزدەۋگە كىرىسكەن. وعان كريمينالدىق پوليتسيا قىزمەتكەرلەرى, ۋچاسكەلىك پوليتسيا ينسپەكتورلارى, پاترۋلدىك پوليتسەيلەر, 40-تان استام ەرىكتى, جوعالعان ازاماتتىڭ جاقىندارى مەن ارىپتەستەرى تارتىلدى.
باق-قا, الەۋمەتتىك جەلىلەرگە ىزدەۋ جاريالاۋ جايلى حابارلار ورنالاستىرىلدى. ىزدەۋدەگى ادامنىڭ سۋرەتى, ايرىقشا بەلگىلەرى كورسەتىلىپ, بۇكىل قالا جۇرتشىلىعى قۇلاقتاندىرىلدى. مۇندايدا ءتۇرلى بولجام مەن قاۋەسەت تە ورتتەي لاۋلادى. «تاعى دا تاكسيستەردى ولتىرەتىندەر شىعىپتى», دەگەن ۇرەي تۇرعىنداردى الاڭداتۋمەن بولدى.
كوپ وتپەي, الەۋمەتتىك جەلىدەگى حابارلاندىرۋدى كورگەن ادامداردىڭ ءبىرى ونى دۇكەندە كورگەنىن جازىپتى. جانىندا ءبىر ادام بولعان. سول دۇكەنگە اسىعىپ-ۇسىگىپ جەتكەن پوليتسيا ىزدەۋدەگىنىڭ اراق ساتىپ الىپ جاتقانىن, جانىندا ونىڭ جاقىندارى تانيتىن ادامنىڭ بولعانىن بەينەكامەراداعى جازبادان كورەدى. ال ول كىسىنىڭ ساياجايى بارىن بىلگەن سوڭ, پوليتسيا تاكسيشىنىڭ جاقىندارىمەن بىرگە بارسا... جوعالعان ادام سوندا «دەم الىپ» جاتىر ەكەن. ءوزىنىڭ بۇكىل قالانى دۇربەلەڭگە سالعانىندا دا جۇمىسى جوق, قىزارا ءبورتىپ, شالجيعان كۇيىندە جاتقان...
ارينە ونىڭ ءوز وتباسىنا حابار بەرمەي, ءىز-ءتۇزسىز كەتكەنىندە ءبىر ءمان بار سياقتى. ايەلىنە رەنجىپ كەتتى مە, الدە تاعى ءبىر سەبەبى بولدى ما؟ ول جاعى بەلگىسىز. پوليتسيا تاۋىپ بەرگەنىنە ءماز, ايەلى تابىلعانىنا ءماز بولىپ تاراسقان.
وسى ورايدا ءبىر ايتا كەتەرلىگى, مۇنداي ايدىڭ-كۇننىڭ امانىندا اياقاستىنان جوعالىپ-تابىلۋشىلارعا قاتىستى جاۋاپكەرشىلىك جۇكتەيتىن نورما قولدانىستاعى زاڭنامادا مۇلدە قاراستىرىلماعان ەكەن. قانشا جۇرتتى اۋرە-سارساڭعا سالعان, حالىق اراسىندا شاعىن بولسا دا دۇربەلەڭ تۋدىرعان ادام ءسويتىپ ەش جازاسىز كەتتى. جەكە باسى ەركىن بولسا دا ءاربىر ادام ءوزىنىڭ قوعام الدىنداعى جاۋاپكەرشىلىگىن سەزىنۋى كەرەك قوي. قازىرگىدەي بايلانىستىڭ دامىعان زامانىندا قانشا اشۋلانسا دا ايەلىنە: «مەن امانمىن, ىزدەمە» دەسە بولۋشى ەدى. بىراق ەرەگىستىڭ سالدارى بولۋى كەرەك, وندايعا تاكسيشى «سەرىنىڭ» اقىلى جەتپەگەن بولىپ شىقتى. وكىنىشكە قاراي, مۇنداي جاۋاپسىزدار قوعامىمىزدا از ەمەستىگى انىق.