توكيو وليمپياداسىندا سىنعا تۇسەتىن دزيۋدوشىلارىمىزدىڭ العاشقى اينالىمداعى قارسىلاستارى انىقتالدى. 60 كيلودا تاتاميگە شىعاتىن ەلدوس سمەتوۆتىڭ جەرەبەسى ءساتتى بولعانىمەن, قالعان سپورتشىلارىمىزدىڭ قارسىلاستارى – «سەن تۇر, مەن اتايىندار».
60 كيلودا سىنعا تۇسەتىن ەلدوس سمەتوۆ وليمپيادا ويىندارىن ەكىنشى اينالىمنان باستايدى. سمەتوۆتىڭ قارسىلاسى – م.اققۇس (تۇركيا)/نامگەل نگاۆانگ (بۋتان) جۇبىنىڭ جەڭىمپازى بولماق. ال 66 كيلو سالماقتا تاتاميگە شىعاتىن ەرلان سەرىكجانوۆتىڭ العاشقى قارسىلاسى – الەم چەمپيوناتىنىڭ كۇمىس جانە قولا جۇلدەگەرى, ەۋروپا چەمپيونى, ازەربايجاندىق ورحان سافاروۆ. سونداي-اق 73 كيلو سالماق دارەجەسىندەگى جانساي سماعۇلوۆتىڭ جاعدايى دا ءماز ەمەس. ونىڭ قارسىلاسى – فەرديناند كاراپەتيان. ارمەنيالىق سپورتشى 2018 جىلى ەۋروپا چەمپيونى اتانعان.
81 كيلو سالماقتاعى ديدار حامزا توكيو ويىندارىنداعى العاشقى اينالىمدا الەم چەمپيونى سايد موللايمەن جولىقسا, 90 كيلو سالماقتا بەلدەسەتىن يسلام بوزباەۆ ەۋروپا چەمپيوناتىنىڭ ەكى دۇركىن قولا جۇلدەگەرى, ازەربايجاندىق مامەدالى مەحديەۆپەن بەلدەسەدى.
48 كيلو سالماقتا ايەلدەر اراسىندا قازاقستان اتىنان جالعىز ءوزى قاتىسىپ وتىرعان ريو وليمپياداسىنىڭ جۇلدەگەرى گالبادراح وتگونتسەتسەگتىڭ ءبىرىنشى اينالىمداعى قارسىلاسى ازيانىڭ ەكى دۇركىن جەڭىمپازى, قىتايلىق لي يانيان بولماق.