ۆەلوسپورتتان قازاقستان كومانداسىنىڭ باس باپكەرى اسان بازاەۆ توكيو وليمپياداسىنداعى جارىس جولىنا باعا بەرىپ, الداعى ماقسات-جوسپارىمەن ءبولىستى.
– الەكسەي لۋتسەنكو قازىر ناعىز بابىندا. «تۋر دە فرانس» دوداسىندا العاشقى جەتىلىككە كىردى. اتالعان جارىستان سوڭ دميتري گرۋزدەۆ دە جاقسى بابىنا ەندى. ۆاديم پرونسكي سوڭعى ەكى اپتادا بيىك تاۋدا جاتتىعۋ وتكىزدى, ءوزىن وتە جاقسى سەزىنۋدە. ولاردىڭ ەڭ نەگىزگى مىندەتى – الەكسەيدىڭ سوڭعى ەلۋ شاقىرىمدا وزگەلەردەن العا قاراي سۋىرىلىپ شىعۋىنا مەيلىنشە جاعداي جاساۋ, – دەگەن ا.بازاەۆ جەڭىسكە جەتۋ ءۇشىن سپورتشىلارعا نە ىستەۋ كەرەك ەكەنىن ايتتى. – جارىس وتە قيىن جاعدايدا وتەدى. ونىڭ ۇستىنە, كۇن رايى دا 32 گرادۋستان جوعارى بولماق. جاڭبىر مەن ىلعالدىلىق تا جاعدايدى قيىنداتا تۇسەتىنى بار. دەسە دە, الەكسەيدىڭ مۇمكىندىگى جوعارى دەپ ەسەپتەيمىن. جالپى, رەلەف بويىنشا جارىس لۋتسەنكونىڭ ىڭعايىنا كەلەدى. تەك 115-ءشى شاقىرىمدا باستالاتىن 15 شاقىرىمدىق تاۋ جولى قيىندىق تۋعىزۋى مۇمكىن. ودان كەيىنگى بيىك جەرلەر التى شاقىرىمنان اسپايدى. ماقساتىمىز – ۇزدىكتەر قاتارىنان كورىنۋ.
ەستەرىڭىزگە سالا كەتەيىك, ۆەلوسپورتتان قازاقستان قۇراماسى 24 شىلدە كۇنى تاس جولداعى توپتىق سايىسقا قاتىسادى.