ەكسپەديتسياعا وبلىس ورتالىعىنداعى ەكى كوللەدجدىڭ ستۋدەنتتەرى اتتاندى. ولار سوعىس كەزىندە حابار-وشارسىز كەتكەن وتانداستاردى ىزدەستىرۋدە, دەپ حابارلايدى Egemen.kz Pavlodarnews.kz سايتىنا سىلتەمە جاساپ.
ەكسپەديتسياعا اتتانعان پاۆلودارلىقتار مولدوۆا رەسپۋبليكاسىنداعى «ەسكە الۋ ۆاحتاسىنا» اتتاندى. «مايدان جولى» جاساعى ۇلى وتان سوعىسى جىلدارىندا حابار-وشارسىز كەتكەندەردى ىزدەۋگە كومەكتەسۋدە. حابار-وشارسىز كەتكەندەردىڭ قاتارىندا قازاقستاندىقتار دا بار.
پاۆلودار جاساعىنىڭ كومانديرى الەكساندر شيتوۆتىڭ ايتۋىنشا, «ۆاحتانىڭ» ەكىنشى كۇنىندە ىزدەۋ جۇمىستارى مولدوۆا رەسپۋبليكاسىنىڭ سپەيا اۋىلىنىڭ ماڭىندا جۇرگىزىلگەن.
«مولداۆيالىق جانە قازاقستاندىق ىزدەۋشىلەر ءىز-ءتۇزسىز جوعالعان كەڭەستىك ساربازدار مەن وفيتسەرلەردىڭ سۇيەكتەرىن ىزدەستىرۋدە. ەكسپەديتسياعا «مايدان جولى», «اۆگۋست» ىزدەۋ جاساعى مەن ورىس تاريحي-پاتريوتتىق كلۋبى قاتىسىپ جاتىر. «ۆاحتانىڭ» ەكىنشى كۇنى 80,4 بيىكتىگىندە (داڭق قورعانى) بەسىنشى جانە سەگىزىنشى ارميالاردىڭ شايقاس ورىندارىندا ءبىر جاۋىنگەردىڭ سۇيەگى تابىلدى», دەدى الەكساندر شيتوۆ.
پاۆلودارلىقتار ەل تاريحىنداعى «ەسكە الۋ ۆاحتاسىنا» اتتانعان العاشقى قازاقستاندىق ىزدەۋشىلەر بولدى. ەكسپەديتسيا «داڭق جولى» حالىقارالىق پاتريوتتىق جوباسى اياسىندا ۇيىمداستىرىلدى.
حابار-وشارسىز كەتكەندەردى ىزدەستىرۋ جۇمىستارى سوعىس جىلدارى ستراتەگيالىق كوپىر بولعان مولدوۆا رەسپۋبليكاسىنىڭ نوۆواننەن اۋدانىندا جۇرگىزىلۋدە. ونىڭ جانىندا وشپەس ەرلىك كورسەتكەن قازاقستاندىق جاۋىنگەرلەرگە ارنالعان گرانيت ەسكەرتكىشى ورناتىلادى.