55 استانالىقتى 21 جاسار تۇركىستان وبلىسىنىڭ تۇرعىنىنىڭ الاياقتىعىنا تاپ بولدى. الاياق سپورتتىق ۇتىسقا اقشا تىگىپ, بايۋدىڭ وڭاي جولىن ۇسىنعان, دەپ حابارلايدى Egemen.kz Polisia.kz سايتىنا سىلتەمە جاساپ.
«جاس جىگىت Instagram پاراقشاسىندا سپورتتىق ۇتىسقا اقشا تىگىپ, 100% ۇتىسقا يە بولۋ تۋرالى حابارلاما جاريالاعان. الاياق ەلوردالىقتاردى سپورتتىق باسەكەگە اقشا تىگۋگە كوندىرىپ, ولاردان ەلەكتروندى ءاميانىنا اقشا جىبەرۋىن سۇرادى. باستەن تۇسكەن پايدانى تاۋلىك ىشىندە جىبەرۋگە ۋادە بەرىپ, اقشانى الىپ العان سوڭ, الدانعان ازاماتتاردىڭ بايلانىس نومىرلەرىن بۇعاتتاپ تاستاعان. تەرگەۋ بارىسىندا انىقتالعانداي, جاس الاياقتىڭ ۇتىس تىگۋگە ەش قاتىسى جوقتىعى جانە جۇرتتان تۇسكەن اقشانى ءوز قاجەتىنە جاراتقانى بەلگىلى بولدى. جەدەل ىزدەستىرۋ شاراسى ناتيجەسىندە الاياق ۇستالىپ, تەرگەۋ يزولياتورىنا قامالدى. كەلتىرىلگەن شىعىننىڭ كولەمى 3 500 000 تەڭگەنى قۇرايدى», دەلىنگەن حابارلامادا.
نۇر-سۇلتان قالاسىنىڭ پوليتسيا دەپارتامەنتى حابارلاعانداي, پاندەميا كەزىندە عالامتوردا جەڭىل اقشا تابۋعا شاقىراتىن جالعان حابارلامالار شارىقتاپ كەتكەن.
«ونىڭ ەشقانداي تالابى جوق, تەك اقشا جىبەرسە بولعانى. وكىنىشكە قاراي, كوپتەگەن ازاماتتار جەڭىل تابىس تابۋ جولىندا الدانىپ جاتادى. وسى ورايدا عالامتوردا جاريالانعان حابارلامالاردىڭ راستىعىن ءجىتى تەكسەرىپ وتىرعان ءجون», دەپ حابارلايدى دەپارتامەنتتەن.
نۇر-سۇلتان قالاسى پوليتسيا دەپارتامەنتى ازاماتتاردان جەلى الاياقتارىنىڭ الداۋىنا ءتۇسىپ قالماۋعا كەڭەس بەرەدى. ينتەرنەتتە جاريالانعان تۇسىنىكسىز جانە كۇماندى ويىن, ۇتىستارعا قاتىسپاۋعا شاقىرادى.