رەسەيدىڭ استراحان وبلىسىنداعى قانداستارىمىز عانا ەمەس, وزگە ۇلتتىڭ وكىلدەرى دە قازاقتىڭ تاريحى مەن مادەنيەتىنە, ونەرىنە قىزىعۋشىلىق تانىتادى, دەپ حابارلايدى Egemen.kz.
ويتكەنى اتالعان ءوڭىردىڭ ۆولودار اۋدانىندا قازاقتىڭ كۇي ونەرىنە مول مۇرا قالدىرعان قۇرمانعازى ساعىرباي ۇلى ماڭگىلىك تىنىستاعان. ال كۇي اتاسىنىڭ شاكىرتى دينا نۇرپەيىسوۆانىڭ استراحان وبلىسىندا تۇرعانى انىقتالىپ وتىر.
استراحان وبلىسى گۋبەرناتورىنىڭ ءباسپاسوز قىزمەتىنىڭ مالىمەتىنە سۇيەنسەك, رەسەي جەرىن 15 جىلعا جۋىق مەكەندەگەن كۇي اناسىنىڭ تۋعانىنا 160 جىلدىق مەرەيتويى اتاپ وتىلمەك. ارنايى ءىس-شارالار جوسپارلانىپ, دينا نۇرپەيىسوۆانىڭ ءومىرى مەن ونەرى جايلى جاڭا كىتاپ جارىق كورەتىن بولادى.
«قۇرمانعازى كۇيشىنىڭ مۇراسىن ناسيحاتتاعان بىرەگەي شاكىرتى 1922-1937 جىلدارى استراحان وبلىسىنىڭ بىرنەشە ەلدى مەكەنىندە تۇرعان. ونىڭ ىشىندە قازىرگى ۆولودار اۋدانىنىڭ كوزلوۆ اۋىلى دا بار. دينا اجەمىز 1934 جىلى مارفين اۋىلىندا وتكەن كوركەمونەرپازدار بايقاۋىندا ءبىرىنشى جۇلدەنى يەلەنگەن. ونى ايعاقتايتىن قۇرمەت گراموتاسى ساقتالعان», دەيدى ولكەتانۋشى اسىلبەك سيتاليەۆ.
ونىڭ ايتۋىنشا, استراحان وبلىستىق مەملەكەتتىك ارحيۆىنەن دينا نۇرپەيىسوۆانىڭ وتباسى مۇشەلەرىنىڭ, ءتىپتى سيىر مەن قويدىڭ ءتىزىمى كورسەتىلگەن قۇجات تابىلىپتى. بۇل – مارفين اۋدانىنداعى كوزلوۆ اۋىلدىق كەڭەسىنىڭ ارحيۆتىك انىقتاماسى. سونداي-اق استراحاندىقتار شىعارعان «ەستەلىك» كىتابىندا ۇلى حاجەن مەن نەمەرەسى قوجاحمەتتىڭ 1941 جىلى ەكىنشى دۇنيەجۇزىلىك سوعىستا حابارسىز كەتكەنى, ال جاۋىنگەرلىك وردەندەر مەن مەدالدارعا يە بولعان ۇلكەن ۇلى جۇرىنبايدىڭ 1946 جىلى ومىردەن وتكەنى تۋرالى جازىلعان.