اتىراۋدا جىل باسىنان بەرى كوشى-قون زاڭدىلىعىن بۇزعاندار 7 ملن تەڭگە ايىپپۇل تولەدى, دەپ حابارلايدى Egemen.kz.
وبلىستىق پوليتسيا دەپارتامەنتىنىڭ باستىعى, پوليتسيا پولكوۆنيگى قامزا ۇمبەتقاليەۆتىڭ مالىمەتىنشە, جىل باسىنان بەرى كوشى-قون زاڭدىلىعىن بۇزعان 4 991 ادام اكىمشىلىك جاۋاپكەرشىلىككە تارتىلعان.
«پوليتسيا قىزمەتكەرلەرى وبلىس اۋماعىندا «ميگرانت», «زاڭسىز كەلۋشى – 2021» جەدەل-پروفيلاكتيكالىق ءىس-شارالارى مەن رەيدتىك تەكسەرىستەردى ءجيى ۇيىمداستىرادى. ماقسات – وڭىردەگى قۇقىقتىق ءتارتىپتى قامتاماسىز ەتۋ, زاڭسىز كەلۋدى, تۇرۋدى, كوشى-قون سالاسىنداعى قىلمىستاردى, زاڭسىز كوشىپ-قونۋشىلاردىڭ ارنالارىن انىقتاۋ. وسىنداي شارالاردىڭ ناتيجەسىندە جىل باسىنان بەرى كوشى-قون زاڭدىلىعىن بۇزعانى ءۇشىن 4 991 ادام اكىمشىلىك جاۋاپكەرشىلىككە تارتىلدى», دەيدى قامزا ۇمبەتقاليەۆ.
ونىڭ ىشىندە 3110 شەتەل ازاماتى بار. سوت شەشىمدەرىمەن كوشى-قون زاڭدىلىعىن بۇزعان 100 شەتەلدىك ەل اۋماعىنان شىعارىلعان.