كاسىپقوي بوكستا ورتا سالماقتا ونەر كورسەتەتىن قازاقستاندىق بوكسشى دانيار ەلەۋسىنوۆ (10-0, 6 كو) جەلتوقسان ايىنداعى جەكپە-جەگىن قازاقستان استاناسىندا وتكىزەدى. بۇل تۋرالى بوكسشىنىڭ مەنەدجەرى زيا اليەۆ مالىمدەدى, دەپ حابارلايدى Egemen.kz.
سونداي-اق سول بوكس كەشىنىڭ اندەركارتىندا تاعى ءبىر قازاقستاندىق بوكسشى يۆان دىچكو (10-0, 10 كو) دا ونەر كورسەتەدى. اسا اۋىر سالماقتاعى بوكسشىعا وزىنەن مىقتى قارسىلاس ىزدەپ جاتىرمىز دەيدى ز.اليەۆ.
«ۇلكەن شوۋ ءۇشىن ءبىز جەلتوقسان ايىن تاڭداپ الدىق. وعان دەيىن دانيار سىرتتا مىقتى قارسىلاسپەن ءبىر جەكپە-جەك وتكىزۋى ءتيىس. يۆان دىچكو كەشە عانا جەكپە-جەك وتكىزگەنىنە قاراماستان جەلتوقسانعا دەيىن تاعى ءبىر قارسىلاسپەن باق سىناپ كورۋى كەرەك. ەكەۋىنە دە مىقتى قارسىلاس تاڭدايمىز», دەدى مەنەدجەر.
زيا اليەۆ قازىر قازاقستاندىق بوكسشىلارعا قارسىلاس ىزدەپ جاتقانىن مالىمدەدى.
ەسكە سالايىق, دانيار ەلەۋسىنوۆ سوڭعى جەكپە-جەگىن بىلتىر قاراشا ايىندا الەمنىڭ ەكس-چەمپيونى, ناميبيالىق دجۋليوس يندونگونى جەڭگەن بولاتىن. ال, يۆان دىچكو بيىل 10 شىلدەدە الماتىدا وتكەن بوكس كەشىندە رەسەيلىك دەنيس باحتوۆتى نوكاۋتپەن جەڭدى.
ايتا كەتۋ كەرەك, دىچكو كاسىپقوي بوكستا وتكىزگەن 10 جەكپە-جەگىنىڭ ءبارىن نوكاۋتپەن جەڭگەن.