بيىل 1 شىلدەدەن باستاپ اكىمشىلىك راسىمدىك-پروتسەستىك كودەكس كۇشىنە ەنگەنى بەلگىلى. وسىعان بايلانىستى ازاماتتاردىڭ ارىز-شاعىمىمەن جۇمىس ىستەۋ جۇيەسى دە وزگەردى. ەندى جۇرتشىلىقتان كەلىپ تۇسكەن بىردە-ءبىر ءوتىنىش جەردە قالمايدى. ولاردىڭ ورىندالۋىن قاداعالايتىن eOtinish ەلەكتروندى جەلىسى ىسكە قوسىلدى.
ەل تۇرعىندارى مەملەكەتتىك قىزمەت سالاسىنا ءجيى شاعىمدانىپ جاتادى. بىراق حالىقتىڭ ءبىرى ءوتىنىشى قارالسا, ەكىنشىسى قۇزىرەتتى ورگان نازارىنان تىس قالاتىنى بار. ال ازاماتتاردىڭ مەملەكەتتىك ورگاندارعا جولداعان ارىز-شاعىمدارى قانشالىقتى قارالىپ, ورىندالعانىن باقىلايتىن بىرىڭعاي جۇيە بولعان ەمەس. ەندى جاڭادان جۇمىس ىستەي باستاعان eOtinish ەلەكتروندى قىزمەتى بىردە-ءبىر ارىز-شاعىمنىڭ جەردە قالماۋىن قامتاماسىز ەتەدى, دەيدى تسيفرلىق دامۋ, يننوۆاتسيالار جانە اەروعارىش ونەركاسىبى ۆيتسە-ءمينيسترى اسەت تۇرىسوۆ. «بۇرىن بىزدە ازاماتتاردىڭ وتىنىشتەرىن قارايتىن, ورىندالۋىن قاداعالاپ وتىراتىن جۇيە بولعان جوق, سوندىقتان ءبىز قانداي دا ءبىر تالداۋ جۇرگىزىپ, وتىنىشتەردىڭ قارالۋ پروتسەسىن باقىلاي المادىق. مۇنداي دەرەك قولىمىزدا بولمايىنشا مەملەكەتتىك مەكەمەلەردىڭ جۇمىس ساپاسىن باعالاۋ جانە ءوتىنىش بەرۋشىلەردىڭ قاي سالاعا كوبىرەك شاعىمداناتىنىن انىقتاۋ دا قيىن. EOtinish ەلەكتروندى وتىنىشتەر جۇيەسىن ەنگىزۋ – وسى ماسەلەلەردى شەشەدى», دەيدى ءا.تۇرىسوۆ.
مينيسترلىك بۇل جۇيە مەملەكەتتىك ورگاندار جۇمىسىنىڭ تيىمدىلىگىن ارتتىراتىنىنا سەنىپ وتىر. ال كەلىپ تۇسكەن ارىز-شاعىمدار اكىمشىلىك راسىمدىك-پروتسەستىك كودەكس بويىنشا 15 جۇمىس كۇننىڭ ىشىندە قارالىپ, جاۋاپ بەرىلۋگە مىندەتتى.
ۆيتسە-ءمينيستردىڭ تۇسىندىرۋىنشە, وتىنىشتەردى ەكى جولمەن بەرۋگە بولادى. تۇرعىندار حالىققا قىزمەت كورسەتۋ ورتالىقتارىنا, اكىمدىككە نەمەسە مەملەكەتتىك ورگانعا كەلىپ, ءوتىنىشىن قالدىرادى. قازىر حقو-لاردا eotinish ارقىلى وتىنىشتەردى قابىلدايتىن ارنايى پۋنكتتەر اشىلعان. ولاردىڭ سانى – 259. حقو وپەراتورى جەكە كابينەتتە ازاماتتىڭ ءوتىنىشىن قابىلداپ, ونى eOtinish جۇيەسىنە تىركەيدى. مەملەكەتتىك ورگاندار قىزمەتكەرلەرى قابىلداعان ءوتىنىشتى جۇيەگە قوسادى.
«EOtinish جۇيەسى ءاربىر اۋىل اكىمدىگىندە دە ورناتىلادى. اكىمدىكتەردىڭ قىزمەتكەرلەرى جۇيەنى پايدالانۋ جونىندە ارنايى وقۋدان ءوتتى. ەندى ولار وسى ەلەكتروندى جۇيە ارقىلى جەرگىلىكتى تۇرعىنداردىڭ ارىز-شاعىمىن قابىلداماق. اۋىل تۇرعىندارى مەملەكەتتىك مەكەمەلەرگە دەگەن قانداي دا ءبىر ءوتىنىش-ۇسىنىسى بولسا, اكىمدىكتەرگە بارىپ, ارىزىن جۇيەگە تىركەتە الادى. ال ەگەر حقو نەمەسە مەملەكەتتىك ورگانعا باراتىن ۋاقىتى بولماسا, وندا ءوتىنىشتى eGov پورتالى, eOtinish, eGov mobile, aitu موبيلدىك قوسىمشالارى ارقىلى بەرۋگە بولادى», دەيدى ءا.تۇرىسوۆ.
ەOtinish ەلەكتروندىق جۇيەسىنىڭ ەرەكشەلىگى سول, ءاربىر ازامات ءوزىنىڭ ءوتىنىشى قايدا, قانداي مەكەمەگە جولدانعانىن, قاي كەزدە قارالعانىن جۇيە ارقىلى قاراپ, باقىلاي الادى. سونىمەن قاتار ارىز-شاعىمىنا دەگەن مەملەكەتتىك مەكەمەنىڭ جاۋابىن باعالاۋعا دا مۇمكىندىگى بار. وسى ارقىلى ءتيىستى ورگانداردىڭ حالىققا قىزمەت كورسەتۋ ساپاسىن سارالاۋعا بولادى.
جۇيەدە ءوتىنىشى تىركەلگەن ازاماتتارعا SMS-حابارلاما ارقىلى ارىز-شاعىمىنىڭ قارالۋ كەزەڭدەرى تۋرالى حابارلامالار جىبەرىلەدى. ونىڭ قارالۋ تاريحى جۇيەدە ساقتالادى جانە مەملەكەتتىك ورگان بۇرىن قانداي شەشىم قابىلدانعانىن سارالاي وتىرىپ, اكىمشىلىك ءىس قالىپتاستىرا الادى.
Eotinish ەلەكتروندى وتىنىشتەر جۇيەسىنىڭ باس وپەراتورى – «ازاماتتارعا ارنالعان ۇكىمەت» مەملەكەتتىك كورپوراتسياسى. كورپوراتسيانىڭ مىندەتى – eOtinish ارقىلى الىنعان دەرەكتەرگە تالداۋ جۇرگىزەدى. مۇنداي تالداۋ جۇمىستارى ەلىمىزدىڭ ءار وڭىرىندەگى تۇرعىنداردى قانداي ماسەلە كوبىرەك تولعاندىراتىنىن, مەملەكەتتىك ورگاندار قانشالىقتى ءتيىمدى جۇمىس ىستەيتىنىن انىقتاۋعا مۇمكىندىك بەرەدى ەكەن.