بيىل قاڭتار ايىندا ەلدەگى تۇرعىن ءۇي باعاسى كەنەت قىمباتتاعان ەدى. مۇنداي جوعارى ءوسىم ءاۋ باستا زەينەتاقى قورىنداعى اقشاسىن پايدالاناتىندار ەسەبىنەن بولعان. قازىر قورداعى ارتىق اقشاسىن كوبى الىپ الدى. ەندى جۇرتتىڭ كوكەيىندەگى ءبىر سۇراق: ءۇي ارزانداي ما؟ بۇل ساۋالعا جاقىندا يندۋستريا جانە ينفراقۇرىلىمدىق دامۋ ءبىرىنشى ۆيتسە-ءمينيسترى قايىربەك وسكەنباەۆ ناقتى جاۋاپ بەردى.
ۇكىمەتتىڭ كەڭەيتىلگەن وتىرىسىندا پرەزيدەنت قاسىم-جومارت توقاەۆ قۇرىلىس ماتەريالدارى مەن جىلجىمايتىن م ۇلىك نارىعى باعاسىنىڭ ءوسۋىن تەجەۋ جونىندەگى كەشەندى شارالار لەگىن قابىلداۋعا تاپسىرما بەرگەنى بەلگىلى. وسىعان بايلانىستى مينيسترلىك بىرقاتار اۋقىمدى جۇمىستاردى قولعا الىپتى. ءبىرىنشى ۆيتسە-ءمينيستردىڭ ايتۋىنشا, ۆەدومستۆو باسپانا باعاسىنا ۇنەمى مونيتورينگ جۇرگىزىپ وتىر. «بيىلعى قاڭتار ايىندا جىلجىمايتىن م ۇلىك نارىعى كەنەت قىمباتتاپ, جاڭا ۇيلەردىڭ باعاسى رەسپۋبليكا بويىنشا بىردەن 3,8%-عا كوتەرىلدى. ال نارىقتاعى باعا 7,2%-عا شارىقتادى. ماۋسىم ايىنداعى مونيتورينگ بويىنشا ەسكى ۇيلەردىڭ باعاسى 1,2%-عا ارتسا, جاڭا پاتەرلەردىڭ قۇنى 0,9% ءوستى», دەدى مينيستر ورتالىق كوممۋنيكاتسيالار قىزمەتى الاڭىندا وتكەن بريفينگتە.
ەلىمىز بويىنشا, اسىرەسە پەتروپاۆل قالاسىندا ءۇي قاتتى قىمباتتاعان. مۇندا قاڭتار-اقپان ايلارىندا ءۇيدىڭ نارىقتاعى باعاسى 5,6%-عا دەيىن ءوسىپ, ءساۋىر ايىندا 2,4%-عا تومەندەگەن.
ق.وسكەنباەۆتىڭ ايتۋىنشا, جىل باسىندا تۇرعىن ءۇي نارىعىنىڭ قىمباتتاۋى زەينەتاقى قورىنداعى اقشانى پايدالانۋعا بايلانىستى بولدى. قازىر باعا تۇراقتالىپ كەلەدى. «مەنىڭ جەكە بولجامىم بويىنشا كۇزگە قاراي تۇرعىن ءۇي باعاسى ارزانداي باستايدى», دەدى ول.
مەملەكەت باسشىسىنىڭ تاپسىرماسىنان كەيىن قازىر قۇرىلىس ماتەريالدارى مەن باسپانا باعاسىن تەجەۋ بويىنشا سەڭ قوزعالىپ جاتقانى انىق. ءتىپتى ءوندىرۋشى مەن قۇرىلىس سالۋشى اراسىندا تىكەلەي كەلىسىم جاساۋ ارقىلى باعانى ارزانداتۋ ماسەلەسى «اتامەكەن» ۇلتتىق كاسىپكەرلەر پالاتاسىنا جۇكتەلدى.
نەگىزى بۇل شەشىمدەر باسپانا باعاسى قىمباتتاماي تۇرىپ قابىلدانۋى كەرەك ەدى. وكىنىشكە قاراي, بىزدە ماسەلە ابدەن ۋشىققاننان كەيىن عانا سەڭ قوزعالادى. ەندى ءبىر كوتەرىلگەن باعانىڭ قايتا ءتۇسۋى ەكىتالاي...