تارباعاتاي اۋدانىندا «ەلەكە سازى» قورعانىن قازۋ كەزىندە ارحەولوگتار ەجەلگى تۇركى ءداۋىرىنىڭ بىرەگەي التىن ارتەفاكتىلەرىن تاپتى, دەپ حابارلايدى Egemen.kz.
«ەكى كۇن بۇرىن عانا بەلگىلى ارحەولوگ زەينوللا ساماشەۆ تارباعاتاي اۋدانىندا قاعانات باسشىلارى بەينەلەنگەن التىن ءتاج ارتەفاكتىلەرىن تاپتى. بۇگىنگى كۇنگە دەيىن ارحەولوگيالىق قازبا جۇمىستارى كەزىندە مۇنداي كونە جادىگەرلەر كەزدەسپەگەن ەدى. بۇل الەمدىك جاڭالىق جاقىندا جارىق كورەتىن ءۇش تومدىق كىتاپ بەتتەرىنە ەنەتىنىنە, ال ارتەفاكتىلەر مۇراجاي ەكسپوناتتارىنىڭ اراسىنان لايىقتى ورىن الاتىنىنا سەنىمدىمىن», دەپ اتاپ ءوتتى دانيال احمەتوۆ الەۋمەتتىك جەلىدەگى پاراقشاسىندا.
ەستەرىڭىزگە سالا كەتەيىك, كەشە ايماق باسشىسى قازاقستان تاريحىنا ارنالعان ءۇش تومدىق كىتاپ رەداكتسياسىنىڭ قۇرامىنا كىرەتىن تاريحشى-عالىمدارمەن جانە ارحەولوگتارمەن كەزەكتى رەت كەزدەستى.
بۇل باسىلىمعا پروفەسسور ز.ساماشەۆتىڭ باسشىلىعىمەن قازبا جۇمىستارى جۇرگىزىلىپ جاتقان ەجەلگى تۇركى ءداۋىرىنىڭ وتە قىزىق ەسكەرتكىشى – ەلەكە سازى شاتقالىنداعى عيبادات ەتۋ-ەسكە الۋ عيماراتىنا بايلانىستى عىلىمي-زەرتتەۋ جۇمىسىنىڭ ناتيجەلەرى كىرەدى.
«بۇل كىتاپتى جازۋعا قۇندى تاريحي جاڭالىقتار اشقان كورنەكتى عالىمدار اتسالىسىپ جاتىر. عالىمداردىڭ ءبىلىمى مەن كاسىبيلىكتەرىنە كۇمان جوق. بۇل وتە ماڭىزدى. ولار كەز كەلگەن تۇسىنىسپەۋشىلىكتىڭ الدىن الاتىن جانە ونى بولدىرماۋعا, باستىسى تاريحي ءارى سەنىمدى فاكتىلەردى جاريالاۋعا ايانباي ەڭبەك ەتىپ جاتىر», دەدى وبلىس اكىمى.
داۋىرلىك تاريحي ەڭبەكتىڭ ءبىر بولىگى قازاقستاننىڭ قالىپتاسۋ تاريحىنا ولشەۋسىز ۇلەس قوسقان تۇلعالارعا ارنالماق. ءۇش تومدىق كىتاپتا 1985-1991 جىلدار ارالىعىنداعى كەزەڭ ەرەكشە باياندالۋى ءتيىس.