ءابىلحان قاستەەۆ اتىنداعى مەملەكەتتىك ونەر مۇراجايىنا 670 مىڭ تەڭگە ايىپپۇل سالىندى. مادەني نىساننىڭ ماڭداعى تۇرعىن ءۇي كەشەنىنىڭ تۇرعىندارى سانەپيدەميولوگتارعا شاعىمدانعان, دەپ حابارلايدى Egemen.kz.
ءابىلحان قاستەەۆ اتىنداعى مەملەكەتتىك مۋزەي - ەلىمىزدىڭ بىرەگەي مادەني نىسانى. مۇراجايدا 25 مىڭنان استام ەكسپونات ساقتالعان. تەك وتكەن اپتادان باستاپ مۇراجاي قىزمەتكەرلەرى قىزمەتىن بۇرىنعىداي ورىنداي الماۋدا. 45 جىل تۇرعان تاريحي نىساننىڭ جانىندا جاڭادان سالىنعان تۇرعىن ءۇي كەشەنىنىڭ تۇرعىندارى مۇراجايدىڭ شۋلى كونديتسيونەرلەرىنە شاعىمداندى. ناتيجەسىندە سانەپيدەميولوگتار عيماراتقا 670 مىڭ تەڭگە كولەمىندە ايىپپۇل سالىپ, 30 كۇن ىشىندە شۋدىڭ جويىلۋ كەرەكتىگى تۋرالى حابارلاما قالدىردى.
مۇراجاي قىزمەتكەرلەرى بولسا مۋزەيدىڭ شۇعىل قاجەتتىلىكتەرى كونديتسيونەرلەردىڭ جۇمىسىنا مۇقتاج ەكەنىن ايتادى.
«بۇل كەز كەلگەن مۇراجايدىڭ مىندەتتى شارتى, ويتكەنى مۇراجاي بولمەلەرىنىڭ تەمپەراتۋراسى 18-20 گرادۋس بولۋى كەرەك. بولمە ىلعالدىعى مەن گرادۋسى بەلگىلەنگەن گرادۋستان تومەن نەمەسە جوعارى بولماۋى كەرەك. بۇل شارالار ساقتالماسا, ەكسپوناتتار زاقىمدانا باستايدى. ءبىز بۇل باعالى مادەني ەسكەرتكىشتەردىڭ زاقىمدانۋىنا جول بەرە المايمىز», دەپ ءتۇسىندىردى قاستەەۆ مۇراجايى ديرەكتورىنىڭ عىلىمي جۇمىستار جونىندەگى ورىنباسارى سۆەتلانا كوبجانوۆا.
مۇراجاي قىزمەتكەرلەرى جاڭا ءۇي سالىنعانعا دەيىن قۇرىلىسقا قارسى بولعانىن ايتادى. قالالىق جوسپارلاۋ جانە ۋربانيستيكا باسقارماسى تۇرعىن ءۇي كەشەنى بارلىق تالاپتارعا ساي سالىنعانىن مالىمدەدى.
مۇراجاي قىزمەتكەرلەرى جۇمىسىن قالاي جالعاستىرارىن بىلمەيدى. كونديتسيونەرلەر وشىرىلسە, ونداعان مىڭ ەكسپوناتتار قاۋىپ-قاتەرگە ۇشىراپ, قۇندىلىعىنان ايىرىلادى.