اقتوبە وبلىستىق پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, 66 جاستاعى وتاعاسى 60 جاستاعى ايەلىنە پىشاق سۇعىپ العان, دەپ حابارلايدى Egemen.kz.
«زەينەتكەرلەر اراسىنداعى جانجال كەزىندە زارداپ شەككەن قاريا وبلىستىق مەديتسينا ورتالىعىنا ءتۇستى. اتالعان دەرەك بويىنشا قىلمىستىق كودەكستىڭ «دەنساۋلىققا قاساقانا اۋىر زيان كەلتىرۋ» بابى بويىنشا سوتقا دەيىنگى تەرگەۋ امالدارى جۇرگىزىلىپ جاتىر. سوت-مەديتسينالىق ساراپتاما تاعايىندالدى. وسى باپتىڭ سانكتسياسى ءۇش جىلدان سەگىز جىلعا دەيىنگى مەرزىمگە باس بوستاندىعىن شەكتەۋ نە سول مەرزىمگە باس بوستاندىعىنان ايىرۋ تۇرىندەگى جازانى كوزدەيدى», دەدى وبلىستىق پد ءباسپاسوز قىزمەتىنىڭ جەتەكشىسى ەربولات سارقۇلوۆ.
ايتا كەتەيىك, جىل باسىنان بەرى وتباسىلىق-تۇرمىستىق 17 قىلمىستىق ءىس تىركەلگەن. ۋچاسكەلىك پوليتسيا ينسپەكتورلارى 2 590 قورعاۋ نۇسقاماسىن شىعاردى, سوتتار قۇقىق بۇزۋشىلاردىڭ ءجۇرىس-تۇرىسىنا 701 ەرەكشە تالاپ قويدى. ونىڭ ىشىندە 564 قۇقىق بۇزۋشىعا قاتىستى الكوگولدىك ىشىمدىكتى پايدالانۋعا تىيىم سالىندى.