IBF مەن IBO تۇجىرىمدارى بويىنشا ورتا سالماقتاعى الەم چەمپيونى گەننادي گولوۆكين الەۋمەتتىك جەلىدە رينگكە قايتا ورالۋىنا قاتىستى جازبا قالدىردى, دەپ حابارلايدى Egemen.kz.
«مەن رينگكە ءوزىم جانە فاناتتارىم ءۇشىن شىعامىن. جاقىندا كورىسەمىز», دەپ جازدى GGG Twitter پاراقشاسىندا.
بىرنەشە ساعاتتىڭ ىشىندە گولوۆكيننىڭ جازباسىنا جۇزدەگەن ادام رەتۆيت جاساعان. ال پىكىر جازعاندار GGG-ءدىڭ الدىمەن دەمەتريۋس اندرادەگە قارسى جەكپە-جەك وتكىزگەنىن قالايتىنىن جەتكىزدى. الۆارەسپەن ءۇشىنشى جەكپە-جەك وتكىزۋگە كەڭەس بەرگەندەر دە بار.
ايتا كەتەيىك, جەلتوقسان ايىندا گەننادي گولوۆكين (41-1-1, 36 كو) ورتا سالماقتاعى WBA چەمپيونى جاپون ريوتا مۋراتامەن (16-2, 13 كو) جەكپە-جەك وتكىزۋدى جوسپارلاپ وتىر. ال Matchroom Boxing پروموۋتەرلىك كومپانياسىنىڭ باسشىسى ەددي حيرن GGG-ءدىڭ قىركۇيەكتە تاعى ءبىر جەكپە-جەك وتكىزۋى مۇمكىن ەكەنىن ايتقان.