قازاقستان رەسپۋبليكاسى قورعانىس مينيسترلىگى ارنايى ماقساتتاعى بولىمشەلەرىنىڭ اسكەري قىزمەتشىلەرى ارنايى ماقساتتاعى بارلاۋ توپتارى اراسىنداعى «جاسىل سوقپاق» دالالىق ماشىقتانۋ كونكۋرسىندا باعىن سىناۋدا. جارىس جىل سايىن رەسەي فەدەراتسياسىندا وتكىزىلەدى. بيىلعى جىلى ول كراسنودار ولكەسىنىڭ مولكينو كەنتىندە وتۋدە, دەپ حابارلايدى Egemen.kz.
«جاسىل سوقپاق» – ەڭ بەدەلدى كونكۋرستىڭ ءبىرى. وعان بالتىق تەڭىزىنەن تىنىق مۇحيتىنا دەيىنگى ارالىقتا ورنالاسقان رەسەي فەدەراتسياسىنىڭ بارلىق وكرۋگى ارنايى ماقساتتاعى بولىمشەلەرىنىڭ كوماندالارى, سونداي-اق ۇقشۇ ەلدەرىنىڭ ارنايى ماقساتتاعى بولىمشەلەرى قاتىسادى.
سايىس 20-دان استام كەزەڭدى قامتيدى. بارلاۋشىلار الىس قاشىقتىققا جىلجۋ, سۋ كەدەرگىسىنەن ءوتۋ, ارنايى مىندەتتى ورىنداۋ, جاۋىنگەرلىك وق اتۋ جانە بارلاۋ توبىن قارسىلاس تىلىنا شىعارۋ كەزىندە توپتاردىڭ ارەكەت ەتۋىن پىسىقتاۋمەن سايىسقا تۇسەدى. جارىستىڭ بارلىق كەزەڭىن ورىنداۋعا 100 ساعات بولىنەدى. مىندەت توقتاۋسىز ورىندالادى. بەرىكتىك پەن توزىمدىلىكتى انىقتايتىن باستى سىناق 10 جانە 30 كيلومەتر قاشىقتىقتا جۇگىرۋ بولىپ تابىلادى.
جارىستىڭ سوڭعى كەزەڭىندە قاتىسۋشىلار شارتتى قارسىلاستىڭ ديۆەرسيالىق توپتارىن تورۋىلداپ, ولاردىڭ شابۋىلىنا تويتارىس بەرەدى.
قورىتىندىلاۋ كەزىندە بارلاۋشىلاردىڭ اسكەري توپوگرافيا سالاسىنداعى ءبىلىمى, بۇركەمەلەۋ, جاسىرىن جىلجۋ شەبەرلىگى, لاگەردى ۇيىمداستىرۋى, مەديتسينالىق جانە ينجەنەرلىك دايارلىق داعدىلارى ەسكەرىلەتىن بولادى.
بارلاۋشىلار كونكۋرسقا قاتىسا وتىرىپ, ءارتۇرلى وڭىردە, تابيعي جانە كليماتتىق جاعدايلاردا جاۋىنگەرلىك ءىس-قيمىلداردى جۇرگىزۋدە تاجىريبە جيناقتايدى. بيىلعى جىلى 47-ءشى رەت وتكىزىلىپ وتىرعان «جاسىل سوقپاق» سايىسى 2 شىلدەدەن 13 شىلدەگە دەيىن جالعاسادى.