بيىل جامبىل وڭىرىندە مال ازىعىنىڭ قىمباتشىلىعى ءارى تاپشىلىعى كۇردەلى ماسەلەگە اينالىپ وتىر. الايدا, اتالعان ماسەلە بويىنشا بۇگىندە ءتيىستى جۇمىستار جۇرگىزىلۋدە. قازىرگى كەزدە سارىسۋ اۋدانىندا ءتورت ت ۇلىكتىڭ سانى ارتىپ, ناتيجەسىندە ءوڭىر تۇرعىندارىنىڭ دا الەۋەتى دە كوتەرىلدى, دەپ حابارلايدى Egemen.kz.
قىستىڭ قامىن جازدا ويلاعان سارىسۋلىق شارۋالار بۇل كۇندە قاۋىرت تىرشىلىككە كىرىسىپ كەتكەن.
اۋدان اكىمى مارات سۇلتانعاليەۆتىڭ اگروونەركاسىپ كەشەنىن دامىتۋعا باعىتتالعان جوسپارىنىڭ ءبىرىنشى ساتىسى دا مال شارۋاشىلىعىنا ارنالعان. وسى ورايدا, مال ازىعىن دايىنداۋ, ساپالى جەم-ءشوپتىڭ بەرىك قورىن جاساۋ - باستى مىندەت بولىپ وتىر. اۋدان باسشىسى قىسقى مال ازىعىنىڭ دايىندىعىن تەكسەرىپ, شارۋا قوجالىقتارىن ارالادى. شارۋا قوجالىقتارىنىڭ باسشىلارىمەن كەزدەسكەن ول جۇمىس بارىسىن ءار اپتا سايىن زەردەلەپ شىعۋدا. بۇگىندە اۋىلداعى تۇرعىندار قورا-قوپسىسىن جوندەپ, شاتىرلارىن بۇتىندەپ, مال ازىعىن دايىنداۋعا كىرىسكەن.
بىزگە مال ازىعىن دايىنداۋ بويىنشا اتقارىلىپ جاتقان جۇمىستار جونىندە اۋدان اكىمى مارات سۇلتانعاليەۆ ايتىپ بەردى.
«جازدىڭ اپتاپ ىستىعى وسىمدىك اتاۋلىعا وڭاي ءتيىپ تۇرعان جوق. وسى ورايدا سارىسۋ اۋدانى بويىنشا ءشوپ دايىنداۋ بارىسىنا توقتالساق, جالپى ءشوپ شابۋعا بەكىتىلگەن القاپ كولەمى 34415 گەكتاردى قۇرايدى. ونىڭ ىشىندە 29370 گەكتار شابىندىق القاپ جانە 5045 گەكتار كوپجىلدىق شوپتەر, ياعني جوڭىشقا. بۇگىنگى كۇنى 5045 گەكتار كوپجىلدىق شوپتەر القابى تولىق شابىلدى, ال تابيعي شابىندىق القاپتىڭ 8020 گەكتارى ورىلدى. دايىندالعان ءشوپ كولەمى 44528 توننا. جۇمىستىڭ ورىندالۋى 44.0 پايىز. بۇدان بولەك, شۋ بويىنان 7100 گەكتار تابيعي قامىس ءشوبى, ساي- سالالار مەن وزەن ارنالارى ورىلادى. «قىستىڭ قامىن جاز ويلا» دەگەندەي, بۇگىندە جاپپاي قىستىق مال ازىعىن دايىنداۋ جۇمىستارى اۋدانىمىزدا قارقىندى جۇرگىزىلۋدە», دەدى ول.