ەلباسىنىڭ 2018 جىلدىڭ 13 ماۋسىمىنداعى جارلىعىمەن ۇلتتىق دومبىرا كۇنى بەلگىلەنگەنى جانە ونى شىلدەنىڭ العاشقى جەكسەنبىسىندە بۇكىل ەل بولىپ تويلاعانىمىز بارشا قازاق جۇرتىنا ەرەكشە رۋحاني سەرپىلىس اكەلگەنىنىڭ كۋاسى بولدىق. ەلدەگى باسقا ۇلت وكىلدەرى دە ۇلتىمىزدىڭ كيەلى اسپابى – دومبىرانىڭ قادىر-قاسيەتىنە ايرىقشا زەر سالىپ, ونىڭ ۇلىلىعىن سەزىنگەن شىعار. بۇل مەرەكەنىڭ تاعىلىمدىق ءمانى ءتىپتى جوعارى بولدى. ول, ءسوز جوق, الداعى ۋاقىتتا انىق بايقالاتىن بولادى.
جۋىردا مەملەكەت باسشىسى قاسىم-جومارت توقاەۆتىڭ الەۋمەتتىك جەلىدە مەكتەپتەردە دومبىرا ۇيرەتۋ ۇيىرمەلەرى بولۋىن قولداعانىن اتا-انالار مەن ۇستازدار ريزاشىلىقپەن قابىلدادى. قازىردىڭ وزىندە الماتى قالاسىنداعى قازاق مەكتەپتەرىنىڭ بارىندە دەرلىك دومبىراشىلار وركەسترى, از دەگەندە دومبىراشىلار ءانسامبلى بار. ەلىمىزدىڭ بارلىق مەكتەبىندە سولاي بولسا ەكەن. مەرەكەمەن بىرگە كەلگەن تاعى ءبىر تابىسىمىز – كۇندەلىكتى ءباسپاسوز بەتىندە كۇي ونەرى, كۇي تابيعاتى, تاريحى تۋرالى, كۇيشىلەر تۋرالى, ءارتۇرلى اڭىز-اڭگىمەلەر, ونىڭ قازاق بولمىسىنداعى ورنى, ت.ب. تانىمدىق ماڭىزى وتە زور قانشاما ماقالالار جارىق كوردى. وسىنداي بەكزات ونەردى تەك بىزگە عانا بۇيىرتقان اللاعا راحمەت. تاريحىمىزدىڭ قيلى-قيلى يىرىمدەرىندە, اقىننىڭ سوزىمەن ايتساق, «مىڭ ءولىپ, مىڭ ءتىرىلىپ» جۇرگەندە جوعالتىپ الماي, بۇگىنگى ۇرپاققا جەتكىزگەن اتا-بابامىزعا, ۇلى ونەردىڭ قادىر-قاسيەتىن سىيلاپ, ونىڭ بولاشاق ۇرپاعىمىزدىڭ رۋحاني ازىعى, جان سەرىگى بولىپ, دۇنيەجۇزىلىك قۇندىلىقتار قاتارىنان ويىپ ءوز ورنىن الۋىنا جول اشقان ەلباسى نۇرسۇلتان نازارباەۆقا راحمەت!
ۇلتتىق دومبىرا كۇنى وتە سالىسىمەن ءبىزدىڭ جىگىتتەر قازاق كۇيىمەن گولليۆۋد تورىندە ونەر كورسەتىپ, جەڭىسكە جەتۋىنە قالاي قۋانبايسىڭ! وسى ۇلى ونەردى باسقالارعا تانىتا بىلسەك قوي. باسقا ەلدىڭ تاجىريبەسىنە زەر سالساق ارتىق بولماس ەدى. ماسەلەن, اۆستريانىڭ استاناسى ۆەنا قالاسىنداعى فيلارمونيانىڭ وركەسترىنە 175 جىل بولىپتى. بۇل وركەستردىڭ ءبىر كەرەمەت ءداستۇرى بار. ءار جىلدىڭ ءبىرىنشى قاڭتارىندا «الەمدىك پرەمەرا» دەگەن اتپەن ارنايى كونتسەرت بەرەدى. ونى باسقا ەلدەر الدىن-الا جاسالعان كەلىسىم ارقىلى ءوز ۇيىندە وتىرىپ-اق كورەدى. ءبىز رەسەيدىڭ «كۋلتۋرا» تەلەارناسى ارقىلى كورەمىز. 2010 جىلى 72 ەلدەن 50 ملن. ادام ونى تاماشالاعان. سوڭعى جىلدارى 90 ەل قابىلدايدى ەكەن. ءتىپتى ەكىنشى دۇنيەجۇزىلىك سوعىس كەزىندە دە ۇزبەي وتكىزىپ وتىرىپتى. نەگىزىندە شتراۋستاردىڭ (اكەسى, ونىڭ ءۇش ۇلى) شىعارمالارى. سوڭىنا قاراي يوگانن شتراۋستىڭ «ۆەنا ورمانىنىڭ ەرتەگىلەرى», «كوگىلدىر دۋناي» ۆالستەرى ورىندالادى دا, اكە-شتراۋستىڭ مارشىمەن اياقتالادى. مارشتى بۇكىل زال تىك تۇرىپ, قول سوعىپ, تىڭدايدى ەكەن. ءداستۇر سولاي. كونتسەرت بارىسىندا باسقا زالدان وسى شىعارمالارعا قويىلعان بالەتتەن ءۇزىندى, ەلدىڭ ادەمى تابيعاتىن ۇشاقتان ءتۇسىرىپ كورسەتىپ وتىرادى. بۇل كونتسەرتتى ءبىر رەت كورگەن ادام جىل بويى كۇتەدى, نەمەسە سول ەلدى كورۋگە بارادى ەكەن. وسى ۇلگىمەن ءبىز دە قازاق كۇيىن دۇنيەگە تانىتساق قوي. ول ءۇشىن الماتى جانە نۇر-سۇلتان قالالارىندا كۇي سالتاناتىن كورسەتە الاتىن ارنايى كونتسەرت زالى بولسا. مۇندا جىل سايىن ۇلتتىق دومبىرا كۇنى ارنايى كونتسەرت ۇيىمداستىرىپ, ونى باۋىرلاس تۇركىتىلدەس ەلدەرگە الدىن-الا جاسالعان كەلىسىم ارقىلى كورسەتە باستاساق, ونىڭ اۋديتورياسى, ءسوز جوق, جىلدان-جىلعا كەڭي بەرەر ەدى. كونتسەرت عيماراتىنىڭ ءبىر زالىندا كۇيشى سازگەرلەردىڭ گالەرەياسىن جاساپ, ولار تۋرالى تولىق اقپارات بەرۋگە بولادى. وسى عيماراتتا ارنايى كىتاپحانا ۇيىمداستىرىپ, كۇي ونەرى مەن كۇيشىلەر تۋرالى ادەبيەتتى جيناستىرساق. ءتىپتى مۇندا كۇي تۋرالى لەكتوري اشىپ, ونەرتانۋشىلار تۇسىنىكتەمە بەرىپ تۇرسا عوي. بۇل ەلگە كەلىپ جاتقان قوناقتار, اسىرەسە ءوزىمىزدىڭ جاستار كۇي قۇدىرەتىن ءتۇسىنۋى ءۇشىن, حالقىنىڭ ۇلتتىق قۇندىلىعىن باعالاي ءبىلۋى ءۇشىن كەرەك-اق.
بۇل ۇسىنىستى وي ءبولىسۋ دەپ قابىلداڭىزدار.
ءشامشا بەركىمباەۆا,
قازاقستاننىڭ ەڭبەك سىڭىرگەن قايراتكەرى