پارلامەنت بيۋدجەتتى ءتيىمدى پايدالانۋعا قاتاڭ باقىلاۋ جاساپ كەلەدى. بۇل تۋرالى بۇگىن پارلامەنت پالاتالارىنىڭ بىرلەسكەن وتىرىسىندا ءماجىلىس توراعاسى نۇرلان نىعماتۋلين ايتتى, دەپ حابارلايدى Egemen.kz.
«وسى پارلامەنتتىك سەسسيا كەزىندە بارلىق فراكتسيا وكىلدەرى ادەتتەگىدەي مەملەكەتىمىزدىڭ ەكونوميكالىق جانە قارجى-بيۋدجەت ساياساتىن قولداۋعا ەرەكشە كوڭىل ءبولدى. سەبەبى قارجى سالاسى ەلىمىزدىڭ دامۋىن, حالقىمىزدىڭ الەۋمەتتىك جاعدايىن قامتاماسىز ەتۋدىڭ باستى كەپىلى. بۇل باعىتتا ءبىز 2021-2023 جىلدارعا ارنالعان رەسپۋبليكالىق بيۋدجەت تۋرالى زاڭعا ءتيىستى تۇزەتۋلەر ەنگىزىپ, ەلباسىنىڭ جانە مەملەكەت باسشىسىنىڭ تاپسىرمالارىن ورىنداۋدى قامتاماسىز ەتتىك. سونىڭ ناتيجەسىندە الەۋمەتتىك قولداۋعا, دەنساۋلىققا, ءبىلىم, شاعىن جانە ورتا بيزنەس, ەڭبەكپەن قامتۋ سالالارىنا, ينفراقۇرىلىم, باسقا دا ماڭىزدى باعىتتاردى دامىتۋعا قوسىمشا ۇلكەن قاراجات ءبولىندى», دەدى پالاتا توراعاسى.
مىسالى, الەۋمەتتىك سالانى نىعايتۋعا 374 ملرد تەڭگە قارالسا, 140 ملرد تەڭگە قارجى رەپۋبليكالىق جانە جەرگىلىكتى جولداردى جوندەۋگە, قايتا قالپىنا كەلتىرۋگە باعىتتالعان. ەڭبەكپەن قامتۋدىڭ جول كارتاسى اياسىندا 100 ملرد-قا جۋىق تەڭگە, ال «اۋىل – ەل بەسىگى!» باعدارلاماسىن جۇزەگە اسىرۋعا 70 ملرد تەڭگە ءبولىندى.
ء«بىر ماسەلە تۋرالى ەرەكشە ايتۋ كەرەك. ول – ەلىمىزدە قالىپتاسقان كوروناۆيرۋس ىندەتىنە قارسى كۇرەسكە بايلانىستى. بۇل ماسەلەنىڭ ەلىمىز ءۇشىن, حالقىمىز ءۇشىن ماڭىزدىلىعىن ەسكەرە وتىرىپ, بيۋدجەتتەن 265 ملرد تەڭگە قاراجات قارالدى. وسىنىڭ بارلىعى, ارينە از اقشا ەمەس. سوندىقتان پارلامەنت بارلىق قاراجاتتى ماقساتقا ساي ءتيىمدى پايدالانۋعا ارقاشاندا قاتاڭ باقىلاۋ جاساپ كەلەدى. سەبەبى, بيۋدجەتتىڭ ءاربىر تيىنى ساپالى, ناتيجەلى, ءتيىمدى جۇمسالۋى كەرەك. ونى ءاربىر قازاقستاندىق ازامات ءبىلۋى جانە سەزۋ قاجەت», دەدى نۇرلان نىعماتۋلين.