وكىنىشكە قاراي, ىندەتتىڭ جىلدام تارايتىن تاعى ءبىر ءتۇرىنىڭ پايدا بولۋى, مەگاپوليستىڭ ەپيدەميالىق احۋالىن وزگەرتتى. سوندىقتان اركىم ءوزىن ساقتاندىرۋى ءتيىس. مىسالى, №36 قالالىق ەمحانادا 99 جاستاعى التىن قۇرساقتى باتىر انا زاعيشا چالوۆا ەكپە الدى. 12 بالانىڭ اناسى, 15 نەمەرەنىڭ اجەسى رەسەيلىك سپۋتنيك V پرەپاراتىن تاڭدادى.
«بۇل – مەنىڭ جەكە شەشىمىم. بۇل ىندەت مەنى دە, تۋىستارىمدى دا اينالىپ وتسە دەيمىن. بالالارىمنىڭ بارلىعى ەكپە الىپ قويعان. قازىر ءوزىمدى جاقسى سەزىنەمىن, ەشقانداي جايسىزدىق بولعان جوق. ءوزىمدى ناشار سەزىنگەن جوقپىن, ءارى قاراي دا وسىلاي بولادى دەپ ۇمىتتەنەمىن», دەيدى اجەمىز.
ەكپە ناۋقانى باستالعاننان بەرى ناۋرىزباي اۋدانىندا 27 مىڭنان اسا ادام ەكپە سالدىرسا, ونىڭ 40%-ى №36 قالالىق ەمحانادا العان.
اۋدان بويىنشا ەكپە العانداردىڭ اراسىندا ۆاكتسينادان سوڭ ەش اسقىنۋلار ورىن الماعان.
«ەلدى مەكەندە ۆاكتسينا العىسى كەلەتىندەردىڭ سانى كوبەيىپ جاتىر. ءار ازامات بەكىتىلگەن جەرىنە قاراماستان قالاداعى قالاعان ەمحانادا ۆاكتسينا الا الادى. كۇندەلىكتى ءبىزدىڭ ەمحاناعا كوروناۆيرۋس ينفەكتسياسىنان ۆاكتسينا الۋعا 150-200 شاقتى ادام كەلەدى», دەيدى №36 قالالىق ەمحانانىڭ باس دارىگەرى گۇلجاينات تىلەگەن.
الماتى