ەلورداداعى رۋحانيات وردالارىنىڭ ءبىرى ساكەن سەيفۋللين مۋزەيىنىڭ قورى باي. وندا كورنەكتى مەملەكەت جانە قوعام قايراتكەرى تۋرالى تىڭ دەرەكتەر, زەردەلى زەرتتەۋلەر مەن جادىگەرلەر جيناقتالعان. سونىڭ ىشىندە كەلۋشىلەر داۋىلپاز اقىننىڭ التىن قالتا ساعاتىنا قىزىعىپ قارايدى. بۇل قۇندى دۇنيەنىڭ وزىندىك تاريحى دا بار.
1934 جىلى جازۋشى ماكسيم گوركيدىڭ باس بولۋىمەن ماسكەۋدە كەڭەس جازۋشىلارىنىڭ بۇكىلوداقتىق ءبىرىنشى سەزى وتەدى. سول كەزدەگى وداق قۇرامىنداعى رەسپۋبليكالاردىڭ كوركەمسوز زەرگەرلەرى جينالعان ماڭىزدى جيىنعا قازاقستاننان ساكەن سەيفۋللين, ءىلياس جانسۇگىروۆ, بەيىمبەت مايلين باستاعان اقىن-جازۋشىلار دەلەگات بولىپ قاتىسادى. ال 1936 جىلى قازاقستان جازۋشىلار وداعىندا ساكەن اتامىزدىڭ ادەبي جانە قوعامدىق قىزمەتىنە 20 جىل تولۋىنا وراي سالتاناتتى كەش ءوتىپ, وسى مەرەيلى جيىندا وكىمەت ارداقتى ازاماتتى ەڭبەك قىزىل تۋ وردەنىمەن ماراپاتتاپ, التىن قالتا ساعات تابىس ەتەدى.
التىن قالتا ساعات شۆەيتساريانىڭ ء«نۇ موZER» فيرماسىندا شامامەن 1870-1880 جىلدارى جاسالعان. ساعات جوعارعى سىناپتى التىن 18 ك /750 سىناما/ سالماعى 100 گر. 1882 جىلى شىققان. ديامەترى – 45 مم, ءۇش قاقپاقتان تۇرادى. سىرتقى قاقپاقتا ساكەن سەيفۋلليننىڭ ەسىمى جازىلعان, ىشكى قاقپاقتا «HY MOZER&CE» «ECHAPPEMENTE ANCHE» «RERRES» «QUALITELEPAINE» فيرماسى دەپ جازىلعان.
ساكەن اتامىز ۇستالىپ كەتكەننەن كەيىن قايراتكەردىڭ زايىبى گۇلباھرام انامىز التىن قالتا ساعاتتى اقىننىڭ قولىنىڭ تابى تيگەن بىرقاتار زاتپەن بىرگە ساقتاپ قالعان. 1973 جىلى ول كىسى قايتىس بولعاننان كەيىن, جاقىندارى ولاردى الماتى مۇراجايىنا تاپسىرعان. قازىر بۇل – ساكەن سەيفۋللين مۋزەيىندەگى باعالى جادىگەردىڭ ءبىرى.