2021 جىلعى 1 ماۋسىمداعى جاعداي بويىنشا 15 668 شەتەلدىك ازامات جەرگىلىكتى اتقارۋشى ورگانداردىڭ رۇقساتى بويىنشا قازاقستان رەسپۋبليكاسىنىڭ اۋماعىندا ەڭبەك ەتۋدە, دەپ حابارلادى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتى.
شەتەلدىك جۇمىس كۇشىن تارتۋعا بەرىلگەن رۇقساتتاردىڭ ىشىندە مىناداي ساناتتار بار: ءبىرىنشى سانات – 667 (باسشىلار جانە ولاردىڭ ورىنباسارلارى), ەكىنشى سانات – 3 260 (قۇرىلىمدىق بولىمشەلەردىڭ باسشىلارى). تارتىلعان شجك-ءنىڭ نەگىزگى بولىگى ءۇشىنشى (ماماندار) جانە ءتورتىنشى (بىلىكتى جۇمىسشىلار) ساناتتارعا جاتادى – تيىسىنشە 7 592 ادام جانە 517 ادام. سونداي-اق ماۋسىمدىق جۇمىستارعا – 1 825 ادام, ال كورپوراتيۆتىك اۋىستىرۋ شەڭبەرىندە – 1 807 ادام تارتىلعان.
قازىرگى ۋاقىتتا قازاقستاندا شجك پايدالاناتىن 1 782 جۇمىس بەرۋشى بار. ولاردا شامامەن 483 مىڭ قازاقستان ازاماتى جۇمىس ىستەيدى, بۇل جالپى جۇمىسشىلار سانىنىڭ 97%-ىن قۇرايدى.
ەڭبەكشى ميگرانتتار شىعاتىن نەگىزگى ەلدەر كەلەسى: قىتاي – 3 689 ادام, وزبەكستان – 1 887 ادام, تۇركيا – 1 679 ادام, ءۇندىستان – 1 090 ادام, ۇلىبريتانيا – 959 ادام.
ەسكە سالا كەتەيىك, ىشكى ەڭبەك نارىعىن قورعاۋ ماقساتىندا ەڭبەك جانە حالىقتى الەۋمەتتىك قورعاۋ مينيسترلىگى جىل سايىن ەلىمىزگە شەتەلدىك مامانداردى تارتۋعا ارنالعان كۆوتا بەلگىلەيدى. 2021 جىلى كۆوتا مولشەرى جۇمىس كۇشىنە شاققاندا 0,31%-دى نەمەسە 29,3 مىڭ بىرلىكتى قۇرادى.