ەل وڭىرلەرىندە 350-دەن استام مادەنيەت نىسانى جەتىسپەيدى. بۇعان قوسا, اۋىلدىق جەرلەردە مادەنيەت كادرلارى تاپشى. بۇل تۋرالى پرەزيدەنت جانىنداعى ادام قۇقىقتارى جونىندەگى كوميسسيا وتىرىسىندا مادەنيەت جانە سپورت ءمينيسترى اقتوتى رايىمقۇلوۆا مالىمدەدى.
جوعارعى سوت سۋدياسى قانات ءمۋسيننىڭ توراعالىعىمەن وتكەن كوميسسيا وتىرىسىندا مادەنيەت جانە ونەر سالاسىنداعى قىزمەتكەرلەردىڭ الەۋمەتتىك-ەكونوميكالىق جانە ەڭبەك قۇقىقتارىن قامتاماسىز ەتۋدىڭ وزەكتى ماسەلەلەرى كەڭىنەن ءسوز بولدى. بايانداما جاساعان اقتوتى رايىمقۇلوۆا جەرگىلىكتى اتقارۋشى ورگانداردىڭ اقپاراتىنا سايكەس بۇگىندە رەسپۋبليكا بويىنشا ايماقتاردا 353 مادەنيەت نىسانى, ونىڭ ىشىندە 127 مادەنيەت ءۇيى, 113 كىتاپحانا, 85 اۋىلدىق كلۋب, 10 تەاتر, 8 مۋزەي, 2 كونتسەرت زالى جانە 2 مادەني-دەمالىس ۇيىمى جەتىسپەيتىنىن ايتىپ ءوتتى.
«مادەنيەت نىساندارىن وڭتايلاندىرۋعا بايلانىستى جەرگىلىكتى اتقارۋشى ورگاندار وسى سالاداعى عيماراتتاردى قىسقارتىپ جاتىر. بۇل ءۇردىس تالداۋ جۇمىستارى كەزىندە انىق بايقالدى», دەگەن مينيستر وڭىرلەردە مادەنيەت ۇيىمدارىن جاپپاي بىرىكتىرۋ تاجىريبەسى بارلىق جەردە قولدانىلاتىنىن جەتكىزدى.
بۇل, اسىرەسە مونوقالالار مەن اۋىل حالقىنىڭ مادەني قۇندىلىقتارعا قولجەتىمدىلىگىن شەكتەيتىنىن ايتقان ول: «ەلدى مەكەندەردەگى مادەنيەت نىساندارى كورسەتەتىن قىزمەتتەردىڭ حالىققا قولجەتىمدىلىگىن قامتاماسىز ەتۋ ءۇشىن جەرگىلىكتى اتقارۋشى ورگاندارعا ەڭ تومەنگى مەملەكەتتىك نورماتيۆتەردى ساقتاۋ ۇسىنىلادى. بۇل ماسەلە, اتاپ ايتقاندا, اۋىل-ايماقتار مەن مونوقالالارعا قاتىستى. مادەنيەت ۇيىمدارىنىڭ قىزمەتتەرىنە تەڭ قولجەتىمدىلىكتى قامتاماسىز ەتۋ جاستاردىڭ دامۋىنا وڭ اسەرىن تيگىزەرى ءسوزسىز. سول سەبەپتى بالالار مەن جاسوسپىرىمدەردىڭ شىعارماشىلىق الەۋەتىن ارتتىرۋعا ەرەكشە ءمان بەرگەن ءجون», دەپ اتاپ ءوتتى ۆەدومستۆو باسشىسى.
مينيستر سونداي-اق قازىرگى تاڭدا جەرگىلىكتى جەرلەردە جاس مامانداردى الەۋمەتتىك قولداۋعا باعىتتالعان بىرقاتار باعدارلامانىڭ جۇمىس ىستەمەيتىنىن دە بۇكپەسىز ايتتى. «مىسالى, «ديپلوممەن – اۋىلعا!» جوباسى ەل وڭىرلەرىندەگى كادر تاپشىلىعى پروبلەماسىن شەشپەيدى», دەگەن ول بۇگىنگى كۇنى اۋىلدىق جەرلەردەگى مادەنيەت ۇيىمدارىنا 1200-دەن استام كادر قاجەت ەكەنىن ايتتى.
«ارحيۆ سالاسىنا بىلىكتى كادر جەتىسپەۋشىلىگىنىڭ باستى سەبەبى ء–ارحيۆشى ماماندىعى مارتەبەسىنىڭ تومەندىگىندە جاتىر». وسىلاي دەگەن ا.رايىمقۇلوۆا جوعارى وقۋ ورىندارىنىڭ بۇل باعىت بويىنشا ماماندار دايارلاۋعا مۇددەلى ەمەس ەكەنىن دە سىنعا الدى. مىسالى, بۇگىندە «ارحيۆ جۇرگىزۋ», «قۇجات جۇرگىزۋ» جانە «قۇجاتتامالىق قامتاماسىز ەتۋ» ماماندىقتارى بويىنشا ماماندار دايارلاۋدى ەلىمىز بويىنشا جالعىز جوعارى وقۋ ورنى – ءال-فارابي اتىنداعى قازاق ۇلتتىق ۋنيۆەرسيتەتى جۇزەگە اسىرادى. «سوندىقتان وڭىرلەردىڭ جوعارى وقۋ ورىندارىندا ارحيۆ ءىسى جانە قۇجاتتاما سالاسى بويىنشا ماماندىقتار اشۋ, ءبىلىم جانە عىلىم مينيسترلىگى «ارحيۆتانۋ», «قۇجاتتانۋ» جانە «قۇجاتتامالىق قامتاماسىز ەتۋ» ماماندىعى بويىنشا مەملەكەتتىك گرانتتاردى ۇلعايتۋى قاجەت», دەدى بايانداماشى.
بۇل رەتتە كوميسسيا مۇشەلەرى وبلىستاردىڭ, رەسپۋبليكالىق ماڭىزى بار قالالاردىڭ, استانانىڭ جەرگىلىكتى اتقارۋشى ورگاندارى قىزمەتىنىڭ تيىمدىلىگىن جىل سايىنعى باعالاۋ جۇيەسىنە اۋىلدىق جانە قالا ماڭىنداعى ەلدى مەكەندەردىڭ مادەنيەت وبەكتىلەرىمەن قامتاماسىز ەتىلۋى سياقتى ولشەمدەردى ەنگىزۋدى ۇسىندى.
مەملەكەتتىڭ باسىم مىندەتتەرىنىڭ ءبىرى – مادەنيەت جانە ونەر مەكەمەلەرى قىزمەتكەرلەرىنىڭ الەۋمەتتىك-ەكونوميكالىق جانە ەڭبەك قۇقىقتارىن قامتاماسىز ەتۋ. سول سەبەپتى دە جيىندا ءسوز العان كوميسسيا مۇشەلەرى بۇل سالا قىزمەتكەرلەرىنىڭ الەۋمەتتىك قورعالۋ دارەجەسى – كەز كەلگەن وركەنيەتتى قوعامنىڭ, مەملەكەتتىك ساياساتتىڭ الەۋمەتتىك باعىتىنىڭ باستى ينديكاتورى بولىپ تابىلاتىنىن اتاپ ءوتتى.
جيىنعا قاتىسقان پارلامەنت, ۇكىمەت, سوت ورگاندارىنىڭ, ءبىلىم, عىلىم, مادەنيەت جانە ونەر مەكەمەلەرىنىڭ, حالىقارالىق جانە ۇكىمەتتىك ەمەس ۇيىمداردىڭ وكىلدەرى, زاڭگەرلەر تابىستى مەملەكەتتىڭ مادەني ساياساتى قوعام مەن مەملەكەت تىنىس-تىرشىلىگىنىڭ بارلىق ماڭىزدى اسپەكتىلەرىن دامىتۋدىڭ ساپالى ولشەمى ەكەندىگىن اتاپ كورسەتتى.
وتىرىستا سونداي-اق ارحيۆ مەكەمەلەرى, كىتاپحانا جۇيەسى ءۇشىن بىلىكتى كادرلاردى دايارلاۋ جانە قايتا دايارلاۋدىڭ وزەكتى ماسەلەلەرى جان-جاقتى تالقىلاندى.
مەملەكەتتىك الەۋمەتتىك تاپسىرىس شەڭبەرىندە مادەنيەت جانە ونەر سالاسىنداعى الەۋمەتتىك ماڭىزى بار جوبالاردى قارجىلاندىرۋ كولەمىن ۇلعايتۋ, سونداي-اق ەلىمىزدىڭ ارحيۆ مەكەمەلەرى ءۇشىن جاڭا عيماراتتار سالۋدى قارجىلاندىرۋ تۋرالى ماسەلەلەردى قاراۋ ۇسىنىلدى.
بۇدان باسقا, كوميسسيا مۇشەلەرى مادەنيەت پەن ونەر سالالارىندا عىلىمي-زەرتتەۋ جۇمىستارىن دامىتۋ, مادەنيەت وبەكتىلەرى قىزمەتىن تسيفرلاندىرۋ, سونداي-اق قازاقستاننىڭ الەمدىك مادەني پروتسەسكە ىقپالداسۋ الەۋەتىن جانداندىرۋعا ەرەكشە نازار اۋداردى.