تابيعاتى تاڭعاجايىپ قارقارالىعا ساياحاتتاپ باراتىن كەيبىر ءتارتىپسىز تۋريستەردىڭ جارتاستار مەن قويتاستارعا «مۇندا ۆاسيا بولدى», «گۋليا + ماكس» دەگەن سياقتى جازبالار قالدىرىپ, كوزسۇيسىنەر سۇلۋلىقتىڭ سىنىنا نۇقسان كەلتىرىپ جاتاتىنى بەلگىلى.
تاياۋدا قاراعاندى مەن قارقارالىنىڭ ەرىكتى جاستارى ء«وز ەلىمدە ءىز قالدىرماي Sayahattime» ەكواكتسياسىن قولداپ, جوعارىدا ايتىلعان تارتىپسىزدىكتىڭ سالدارىمەن كۇرەسكە شىقتى. بەلسەندى جاستار قارقارالى مەملەكەتتىك ۇلتتىق تابيعي پاركىندەگى ء«ۇش ۇڭگىر» جارتاسىنداعى جابايى جازۋلاردى ءوشىردى. ۆولونتەرلەر جازبالاردى جويۋعا ارنايى حيميالىق ەرىتىندىلەردى پايدالاندى. كەيبىر جەرلەردە گاز قىزدىرعىشتارىن دا قولدانۋعا تۋرا كەلدى.
ايتا كەتۋ كەرەك, قارقارالىداعى تۋريستىك مارشرۋتتار بويىنداعى جازۋلار مەن سۋرەتتەردى ءوشىرۋ باستاماسىن Kazakh Tourism ۇلتتىق كومپانياسى كوتەرگەن بولاتىن. ال اكتسيانى قولداعان Jana Dunie قايىرىمدىلىق قورى ەرىكتىلەردى جارتاستى تازارتۋعا قاجەتتى قۇرال-جابدىقتارمەن قامتاماسىز ەتتى.
اكتسياعا بەلسەنە قاتىسقان جاناراي ساناقباي جارتاستاعى جازۋلاردى جويۋ بويىنشا وسىنداي ءىس-شارالاردىڭ الداعى ۋاقىتتا دا جالعاسىن تاباتىنىنا سەنىم ءبىلدىردى.
– ءبىز وبلىس تۇرعىندارى مەن قارقارالى مەملەكەتتىك ۇلتتىق تابيعي پاركىنىڭ قوناقتارىن تابيعاتتى ايالاۋعا شاقىرامىز. الداعى ۋاقىتتا مۇندا تابيعاتتى قورعاۋعا شاقىراتىن تاقتايشالار ورناتاتىن بولامىز. سەبەبى ءبىز جەرىمىزدى ۇرپاقتارىمىزعا باستاپقى كۇيىندە ساقتاپ, تاپسىرۋعا مىندەتتىمىز, – دەيدى جالىندى جاس.
جاستاردىڭ ءونىمدى جۇمىسىنان كەيىن ء«ۇش ۇڭگىر» جارتاسى بۇرىنعى كەلبەتىنە يە بولىپ, جارقىراي ءتۇستى. بۇدان بولەك اكتسياعا قاتىسۋشى ەرىكتىلەر سەنبىلىك ۇيىمداستىرىپ, توڭىرەكتى تۋريستەر تاستاپ كەتكەن قوقىستان تازارتتى.
قاراعاندى وبلىسى,
قارقارالى اۋدانى