جامبىل وبلىسىنىڭ شۋ قالاسىندا «قاراسورا-2021» كەڭ اۋقىمدى وپەراتسياسىنىڭ رەسمي اشىلۋى ءوتتى. ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى, پوليتسيا گەنەرال-مايورى تىلەگەن ماتكەنوۆ جامبىل وبلىسى پوليتسيا دەپارتامەنتى باسشىلىعىنىڭ قاتىسۋىمەن وبلىستىق پوليتسيا دەپارتامەنتتەرىنىڭ ەسىرتكى قىلمىسىنا قارسى ءىس-قيمىل جونىندەگى اۋماقتىق بولىمشەلەرىنىڭ باستىقتارىمەن, ۇلتتىق ۇلان, جەرگىلىكتى اتقارۋشى ورگاندار وكىلدەرىمەن نۇسقاۋلىق كەڭەس وتكىزدى.
ت.ماتكەنوۆتىڭ ايتۋىنشا, «قاراسورا» جەدەل الدىن الۋ ءىس-شاراسىن وتكىزۋدەگى نەگىزگى ماقسات – ەلدىڭ وڭتۇستىك وڭىرلەرىنەن كاننابيس توبىنىڭ ەسىرتكىلەرىن دايىنداۋمەن جانە اكەتۋمەن اينالىساتىن ادامداردى انىقتاۋ, گەروين ترافيگى ارنالارىنىڭ جولىن كەسۋ, سونداي-اق سينتەتيكالىق ەسىرتكىنى تاراتۋعا مامانداندىرىلعان ۇيىمداسقان قىلمىستىق توپتاردىڭ قىزمەتىن, زاڭسىز ەسىرتكى زەرتحانالارىن جويۋ.
بۇل وپەراتسيانىڭ اشىلۋ ورنى رەتىندە شۋ قالاسىنىڭ بەلگىلەنۋى كەزدەيسوق ەمەس. تاجىريبە كورسەتكەندەي, وتكەن جىلى شۋدان شىققان كاننابيس توبىنىڭ ەسىرتكىلەرى ەلدىڭ بارلىق ايماقتارىنان دەرلىك الىنعان.
جامبىل جانە قىزىلوردا وبلىستارىنىڭ پوليتسيا دەپارتامەنتتەرىندە كاننابيستى تاسىمالداۋ بارىسىندا پايدالانۋى مۇمكىن جەرلەردى, اۋىلدىق جولداردى ەسكەرە وتىرىپ, پاترۋلدەۋ باعىتتارى ازىرلەندى. قۇرامىندا ەسىرتكى بار وسىمدىكتەردى ءوسىرۋ ورىندارىن انىقتاۋ ماقساتىندا ءىىم مەن ۇلتتىق ۇلاننىڭ ارنايى ماقساتتاعى بولىمشەلەرىن, كۇشتەر مەن قۇرالداردى تارتا وتىرىپ, قىزىلوردا وبلىسى مەن وعان شەكارالاس اۋماقتاردا اۋە بارلاۋى جۇزەگە اسىرىلادى. سوڭعى بىرنەشە جىل ىشىندە ەلدىڭ وڭتۇستىك ايماقتارىندا ۇيىمداسقان قىلمىستىق توپتاردىڭ تەتراگيدروكاننابينولدىڭ كوپ مولشەرى بار ماريحۋانا جاسالعان ء«ۇندى قاراسوراسىن» ءوسىرۋدى جولعا قويۋ ارەكەتتەرى تۇراقتى تۇردە انىقتالىپ, ونىڭ جولى كەسىلۋدە.
كەڭەستە پوليتسيا دەپارتامەنتتەرىنىڭ ەسىرتكى قىلمىسىنا قارسى ءىس-قيمىل جونىندەگى بولىمشەلەرىنىڭ وسى جىلدىڭ 5 ايىنداعى جەدەل-قىزمەتتىك جۇمىسىنىڭ قورىتىندىسى شىعارىلدى ءارى الداعى كەزەڭگە بىرقاتار تاپسىرما بەرىلدى.
بۇدان كەيىن, نۇسقاۋلىق كەڭەسكە قاتىسۋشىلار جامبىل وبلىسىنىڭ شۋ اۋدانىندا ورنالاسقان «دەلتا-دولينا» ارنايى بولىمشەسىنىڭ ماتەريالدىق-تەحنيكالىق جابدىقتارىمەن تانىستى. وسى باعىتتا تاجىريبە الماستى.
ەستەرىڭىزگە سالا كەتەيىك, «قاراسورا» كەڭ اۋقىمدى وپەراتسياسى جىل سايىن ماۋسىم مەن قازان ارالىعىندا قاراسورا وسەتىن كەزدە وتكىزىلەدى. 2020 جىلى وپەراتسيا ناتيجەسىندە 830 قىلمىس انىقتالعان. تۇركىستان, قىزىلوردا جانە قاراعاندى وبلىستارىندا جالپى كولەمى 260 گەكتاردان استام 62 پلانتاتسيا, سالماعى 20 توننادان اساتىن 53 مىڭ ءتۇپ قاراسورا الىنىپ, جويىلعان. نەگىزگى بولىگى قىزىلوردا وبلىسىنا تيەسىلى 48 پلانتاتسيا جويىلىپ, 14 توننادان استام قۇرامىندا ەسىرتكى بار وسىمدىكتەر تاركىلەنگەن. قاراعاندى جانە قىزىلوردا وبلىستارىنىڭ شەكاراسىندا تىكۇشاقپەن ۇشۋ كەزىندە قىزىلوردا ءوڭىرىنىڭ تۇرعىندارى ۇستالعان, ولار ءوز كولىكتەرىنە جاسىرىنىپ, اتىس قارۋىن قولدانا وتىرىپ قارسىلىق كورسەتكەن.