تاجىكستان استاناسى دۋشانبەدە شانحاي ىنتىماقتاستىق ۇيىمىنا مۇشە ەلدەر ايەلدەرىنىڭ ءىىى فورۋمى ءوتتى. فورۋمعا قازاقستاننان پرەزيدەنت جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيانىڭ ءتورايىمى ءلاززات رامازانوۆا, قازاقستانداعى ادام قۇقىقتارى جونىندەگى ۋاكىل ەلۆيرا ءازىموۆا, سونداي-اق ۇلتتىق كوميسسيانىڭ باسقا دا مۇشەلەرى مەن ساراپشىلارى ونلاين فورماتتا قاتىستى.
فورۋمنىڭ پىكىرتالاس الاڭدارىندا شىۇ ەلدەرىندە ايەلدەردىڭ قۇقىقتارىن قورعاۋدىڭ ينستيتۋتسيونالدىق تەتىكتەرىن نىعايتۋ, كەمسىتۋشىلىكتى, ونىڭ ىشىندە ايەلدەر مەن قىزدارعا قاتىستى زورلىق-زومبىلىقتى جويۋ ماسەلەلەرىندەگى ءوزارا ءىس-قيمىل مەن ىنتىماقتاستىقتى جاقسارتۋ, سونداي-اق ايەلدەردىڭ كاسىپكەرلىك قىزمەت سالاسىنداعى قۇقىقتارى مەن مۇمكىندىكتەرىن كەڭەيتۋ ماسەلەلەرى تالقىلاندى.
«پاندەميامەن بايلانىستى جاھاندىق قيىندىقتى ەڭسەرۋ ءۇشىن بارلىق ەل ءۇشىن قازىرگى قيىن ۋاقىتتا ايەلدەردىڭ كۇش-جىگەرى ەرەكشە ماڭىزعا يە بولدى. ايەلدەر وڭ وزگەرىستەر مەن پروگرەستىڭ, داعدارىس سالدارىن ەڭسەرۋدىڭ قوزعاۋشى كۇشى بولا الاتىنىن ءتۇسىنۋ ماڭىزدى», دەدى ل.رامازانوۆا.
ۇلتتىق كوميسسيا باسشىسى تەڭدىك قاعيداتتارىن جاپپاي ىلگەرىلەتۋگە ۇلتتىق ينستيتۋتتاردىڭ الەۋەتىن جانە ايەلدەردىڭ قۇقىقتارىن قورعاۋ تەتىكتەرىن نىعايتۋ, ايەلدەردىڭ شەشىمدەر قابىلداۋ دەڭگەيىندە دەموكراتيالىق قاتىسۋىن دامىتۋ, سونداي-اق بارلىق سالادا ايەلدەردىڭ قۇقىقتارى مەن مۇمكىندىكتەرىن كەڭەيتۋ ىقپال ەتەتىنىن اتاپ ءوتتى.
فورۋم الاڭىندا بەيبىتشىلىك جانە وڭىرلىك قاۋىپسىزدىك ماسەلەلەرى قوزعالدى. «قازاقستان يادرولىق قارۋدان ءوز ەركىمەن باس تارتقان بەيبىتسۇيگىش مەملەكەت رەتىندە وڭىرلىك جانە حالىقارالىق دەڭگەيلەردە ەلدەر اراسىندا جانجالدى جاعدايلارعا جول بەرمەۋدى قولدايدى. ءبىز ايەلدەر پرەۆەنتيۆتى ديپلوماتيانىڭ الدىڭعى قاتارىندا بولۋعا, وڭىردەگى ءوزارا سەنىمدى, تاتۋ كورشىلىكتى, بەيبىتشىلىك پەن قاۋىپسىزدىكتى نىعايتۋ بويىنشا ورتاق كۇش-جىگەرىمىزدى جۇمىلدىرۋعا ءتيىسپىز», دەپ اتاپ ءوتتى قازاقستان پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتورايىمى.
قازاقستان رەسپۋبليكاسىنداعى ادام قۇقىقتارى جونىندەگى ۋاكىل ەلۆيرا ءازىموۆا فورۋمعا قاتىسۋشىلاردى مەملەكەت باسشىسىنىڭ 2021 جىلعى 9 ماۋسىمدا قول قويعان «قازاقستان رەسپۋبليكاسىنىڭ ادام قۇقىقتارى سالاسىنداعى ودان ءارى شارالارى تۋرالى» جارلىعى جونىندە حاباردار ەتتى. وندا ۇكىمەتكە ادام قۇقىقتارى سالاسىنداعى, ونىڭ ىشىندە ايەلدەرگە قاتىستى كەمسىتۋشىلىكتى جويۋعا باعىتتالعان ءبىرىنشى كەزەكتەگى ءىس-شارالار جوسپارىن قابىلداۋ تاپسىرماسى قامتىلعان.
قازاقستاندىق تاراپ قارالاتىن ماسەلەلەر بويىنشا ىنتىماقتاستىقتى نىعايتۋعا جانە حالىقارالىق باستامالاردى ىسكە اسىرۋعا سىندارلى ۇلەس قوسۋعا دايىن ەكەنىن ءبىلدىردى. شىۇ-عا مۇشە مەملەكەتتەردىڭ ايەلدەردىڭ ساياسي كوشباسشىلىعى ماسەلەلەرى, ايەلدەردى قولداۋ ماقساتىندا داعدارىسقا قارسى قابىلدانعان شارالار جانە ايەلدەر قۇقىعىنا قاتىستى باسقا دا ماسەلەلەر بويىنشا اقپارات جانە وزىق تاجىريبە الماسۋدىڭ بىرىڭعاي بانكىن قۇرۋ ۇسىنىلدى.