فۋتبولدان قازاقستان چەمپيوناتىنىڭ 15-تۋرىنداعى سوڭعى ءۇش باسەكە نۇر-سۇلتان, تاراز جانە قىزىلوردا قالالارىندا ءوتتى.
ەلوردا تورىندە چەمپيوندىق اتاقتان باستى ۇمىتكەر قوس كوماندا – «استانا» مەن «توبىل» ءوزارا كۇش سىناستى. الما-كەزەك شابۋىلمەن وتكەن باسەكە بارىسىندا قوناقتار ەسەپ اشتى. 29-مينۋتتا نەمانيا نيكوليچ قوستانايلىقتاردى العا شىعاردى. بىراق ولار بۇل باسىمدىقتى ۇستاپ تۇرا المادى. ارادا 15 مينۋت وتكەننەن سوڭ الاڭ يەلەرى پەنالتيدەن ەسەپتى تەڭەستىردى – 1:1. بۇل گولدىڭ اۆتورى – مارين توماسوۆ. سودان كەيىن ەسەپ وزگەرگەن جوق. «تاراز» بەن «قايرات» اراسىنداعى ماتچتا الماتىلىقتار جەڭىسكە جەتتى – 0:2. قوناقتار قاتارىندا مەرگەندىك تانىتقاندار – ۆاگنەر لاۆ (11-مينۋت) پەن ارتۋر شۋشەناچەۆ (67-مينۋت). ال «قايسار» مەن «اتىراۋ» اراسىنداعى ماتچتا ەسەپ اشىلعان جوق – 0:0.
جارىس كەستەسىندە «استانا» ءالى دە جەكە-دارا كوش باستاپ تۇر. ەلوردالىق فۋتبولشىلار 35 ۇپاي ولجالاپ ۇلگەردى. ولاردى «توبىل» وكشەلەپ كەلەدى. قوستانايلىق كلۋبتىڭ قورجىنىندا 32 ۇپاي بار. 27 ۇپاي جيعان «قايرات» ءۇشىنشى ورىندى يەلەنۋدە.