ورالدا 37 جاستاعى ەر ادام قىزعانىشتان سۇيىكتىسىن تەپكىلەپ, پىشاقتاپ تاستادى. قازىر 36 جاستاعى جابىرلەنۋشى جانساقتاۋ بولىمىندە اۋىر حالدە جاتىر, دەپ حابارلايدى Egemen.kz.
وقىس وقيعا باقىلاۋ كامەراسىنا جازىلعان. ەر ادام دۇكەنگە كىرىپ, ەكى ساتۋشى مەن كىشكەنتاي قىزدى بۇرىشقا تاقاپ الىپ, دوق كورسەتىپ تۇر. كەيىن ەكى ايەل دە تاياق جەپ, شەتتەگىسى بىرنەشە مارتە پىشاقتالادى. كىشكەنتاي قىز اناسىن قورعاپ الەك. بىراق قاسكوي وعان قاراپ جاتقان جوق. اقىرىندا ول وقيعا ورىنان ءىز سۋىتادى. بىراق دۇكەننەن شىعا بەرگەندە ءتارتىپ ساقشىسىنىڭ كوزىنە ءتۇسىپ, ۇستالىپ قالادى.
«ول اقتوبە قالاسىنىڭ 37 جاستاعى تۇرعىنى بولىپ شىقتى. ونىڭ جابىرلەنۋشىمەن بىرنەشە جىلدان بەرى بايلانىسى بولىپ, ورالعا ءجيى كەلىپ جۇرگەنى انىقتالدى. سول كۇنى كەزەكتى مارتە سۇيكتىسىن ىزدەپ كەلگەن بەتى ەكەن. ال ءتارتىپ ساقشىلارى كۇدىكتىنىڭ بۇل قادامعا بارۋىنا قىزعانىش سەبەپ بولعان دەيدى. قىلمىس جاساعان كەزدە ماس بولعان. عاشىعىن مەرت قىلا جازداعان اقتوبە تۇرعىنى قاماۋعا الىندى. ال جابىرلەنۋشى جانساقتاۋ بولىمىندە جاتىر», دەلىنگەن بقو پد ءباسپاسوز حابارلاماسىندا.