قازاقستان بۇۇ-نىڭ ەكونوميكالىق جانە الەۋمەتتىك كەڭەسى قۇرامىنا سايلاندى, دەپ حابارلايدى Egemen.kz.
«بۇۇ باس اسسامبلەياسىنىڭ 73-ءشى پلەنارلىق وتىرىسىندا قازاقستان 2022-2024 جىلدارعا بۇۇ ەكونوميكالىق جانە الەۋمەتتىك كەڭەسىنىڭ قۇرامىنا سايلاندى», دەلىنگەن ءسىم حابارلاماسىندا.
كەڭەس بۇۇ-نىڭ ەكونوميكالىق, الەۋمەتتىك جانە ەكولوگيالىق قىزمەتىن ۇيلەستىرۋگە جاۋاپتى نەگىزگى ورگان جانە وسى سالالارداعى وزەكتى ماسەلەلەر بويىنشا شەشىمدەردى ىلگەرىلەتۋگە ارنالعان ورتالىق الاڭ سانالادى.
ءسىم مالىمەتى بويىنشا, قازاقستان ورنىقتى دامۋدىڭ جاھاندىق ماقساتتارىن ءتيىمدى ىسكە اسىرۋ جانە ورتالىق ازياداعى نەعۇرلىم ماڭىزدى گۋمانيتارلىق ماسەلەلەردى شەشۋ ءۇشىن حالىقارالىق قارجى جانە ساۋدا ۇيىمدارىمەن ىنتىماقتاستىقتى نىعايتۋعا نيەتتى. كەڭەسكە مۇشە بولۋ قازاقستانعا ەكونوميكا, الەۋمەتتىك سالا جانە مەملەكەتتىك باسقارۋ رەفورمالارىندا تابىستى الەمدىك تاجىريبەنى تارتۋعا ىقپال ەتەدى.
داۋىس بەرۋ قورىتىندىسى بويىنشا كەڭەس مۇشەلەرى اۋعانستان, بەليز, بەلگيا, ءۇندىستان, يتاليا, كانادا, كوت-د'يۆۋار, ماۆريكي, ومان, پەرۋ, اقش, تانزانيا, تۋنيس, حورۆاتيا, چەحيا, چيلي جانە ەسۆاتيني بولدى. قازاقستاندى 180 مەملەكەت قولداعان.
بۇعان دەيىن قازاقستان 2007-2009 جانە 2014-2016 جىلدار كەزەڭىندە ەكى رەت سايلاندى.