وڭىردەگى يگىلىكتى ءىستىڭ ءبىرى – «جاقسىلىق سورەسى» جوباسى. ىزگى نيەتپەن باستالعان جوبا بارىسىندا ايتارلىقتاي شارۋا تىندىرىلۋدا. ەڭ باستىسى, ادامگەرشىلىككە تۇنىپ تۇرعان ونەگەلى ءىس ءورىسىن جايىپ كەلەدى. ەل قامىن جەيتىن, قىسىلعان ادامداردى قولتىعىنان دەمەيتىن جومارت جاندار از ەمەس ەكەن.
بۋراباي اۋدانىندا ەرىكتىلەر قوزعالىسىنا جەتەكشىلىك ەتەتىن ولەسيا بايموۆا ءدال وسىنداي باستامانى قولعا العان بولاتىن. جاستار بىردەن جۇمىلا كەتتى. ءبىر-بىرىنەن قۇلاقتانىپ, اۋدانداعى كاسىپكەرلەر, اسىرەسە ازىق-ت ۇلىك دۇكەندەرىنىڭ يەلەرى بۇل ءبىر قىسىلتاياڭدا قاجەت قادام ەكەن دەسىپ, قولۇشىن سوزۋدا. انشەيىندە بولار-بولماس دۇنيە كورىنەتىن از عانا كومەك كىسى كوڭىلىن دەمەپ, جانىن جادىراتادى. باعالى باستامانىڭ كومەگىن الەۋمەتتىك جاعىنان از قامتاماسىز ەتىلگەن وتباسىلارى مەن جالعىزىلىكتى جاندار كورىپ وتىر. ولارعا قايىرىمدىلىق ەسەبىندە بەرىلگەن ازىق-ت ۇلىك ەمەس, زامانداستارىنىڭ جاناشىرلىق نيەتى قىمبات. قازىر اۋدانداعى 11 ازىق-ت ۇلىك دۇكەنىندە قايىرىمدىلىق سورەسى بار. ادامدار تاڭەرتەڭ وسى دۇكەندەرگە سوعىپ, الدەكىمگە قاجەت بولادى-اۋ دەگەن ازىق-ت ۇلىكتى ءوز قاراجاتىنا ساتىپ الىپ, جاقسىلىق سورەسىنە قويىپ كەتەدى. ءبارى ءبىر-بىرىمەن ۋادەلەسىپ قويعانداي اتى-جوندەرىن اتاماۋدى وتىنەدى. شىنىندا دا جاقسىلىق جاساعان ادامنىڭ جارناماعا ءۇيىر ەمەس ەكەنى بەلگىلى. وسى جەردەن مۇقتاج ادامدار وزدەرىنە كەرەك تاۋارلارىن تەگىن الىپ كەتىپ جاتىر. ارينە, قايىرىمدى جاندارعا اق العىستارىن دا جولدايدى. مۇنىڭ ارعى جاعىندا ءبىر-بىرىنە دەگەن ىزەتتى كوڭىل, ىزگىلىكتى پەيىل جاتىر. اينالىپ كەلگەندە قوعام جاقسىلىق دىڭگەگىنىڭ توڭىرەگىندە توپتاسىپ, بىرلىك بەكەم بولا تۇسەدى.
جەكەلەگەن ادامدارعا دا قايىرىمدىلىق كورسەتۋ كەڭ ءورىس الۋدا. وتكەن اپتا ىشىندە ۇزىن-ىرعاسى 90-عا جۋىق جالعىزىلىكتى ادامعا قارجىلاي كومەك كورسەتىلىپتى. اۋداننىڭ ىسكەر ازاماتتارى ەرىكتىلەردىڭ وتىنىشتەرىن مۇقيات تىڭداپ, قولۇشىن بەرۋگە قۇبا-قۇپ. تاعدىر تالكەگىنە ۇشىراعان, اۋىر سىرقاتقا دۋشار بولعان ادامدار دا اتىمتاي جومارتتاردىڭ جاقسىلىعىن كورىپ, ءۇمىت وتىن لاۋلاتا تۇسۋدە. وسى ارادا ءبىر مىسال كەلتىرە كەتەلىك, كامەش قامالجان ەسىمدى سىرقاتقا كومەك كورسەتۋ بارىسىندا ەرىكتىلەر 4,2 ملن تەڭگە جيناپ, جان جىلۋىنا بولەگەن. ءدال وسىنداي مىسالدى ىرگەدەگى بۇلاندى اۋدانىنان دا كەزىكتىردىك. اۋداننىڭ جومارت جاندارى يليا چەرنىشوۆتىڭ ەمدەلۋىنە 1,3 ملن تەڭگە قاراجات جيناپ بەرىپتى. اتپال ازاماتتار عانا ەمەس, زەينەتكەرلەردىڭ دە وسى ءبىر يگىلىكتى ىسكە ۇلەس قوسقانىن ەستىگەندە, كوڭىلىڭ بۇرلەپ كەتەدى.
جاقسىلىق جارىسى اۋدان ورتالىقتارىندا عانا ەمەس, اۋىلدىق جەرلەردە دە جيىلەگەن. ايتالىق, اقكول اۋدانىنا قاراستى نوۆورىبينسك اۋىلدىق وكرۋگىندە كوپبالالى, الەۋمەتتىك جاعىنان از قامتىلعان وتباسىلار مەن جالعىزىلىكتى ادامدارعا ازىق-ت ۇلىك سەبەتى تاراتىلعان. بۇل جۇمىسقا نەگىزىنەن وبلىستىق «قىزىل جارتى اي» قوعامىنىڭ فيليالى مۇرىندىق بولعان ەكەن. ناتيجەسىندە, قانشاما وتباسى قامقور كوڭىلدىڭ ىزەتتى جاردەمىنە كوڭىل توعايتىپ قالدى. ولار ءۇشىن ەڭ باستىسى, كوڭىل ەدى. وزدەرىنىڭ كەشەگى كارانتين كۇندەرى قيىندىقپەن جالعىز الىسپاي, كوپپەن كورگەن سىناق ەكەنىن جەتە ءتۇسىنىپ وتىر.
– ءدام-تۇزدارىنا راحمەت, – دەيدى اۋىل تۇرعىنى ۆالەنتينا بايباتىروۆا. – اس-سۋىمىز جەتكىلىكتى. ءبىز ءۇشىن باعالىسى – ەلدىڭ ىزگى تىلەگى. ايتەۋىر ساناتتا بولعانىمىزعا قۋاندىق ەمەس پە؟!
وسى اۋداننىڭ جالعىزقاراعاي اۋىلدىق وكرۋگىنىڭ جاستارى دا ەل ىشىندەگى ەگدە ادامداردىڭ اماندىقتارىن ءبىلىپ, ادەيىلەپ ىزدەپ بارىپ سالەم بەرىپ, حال-احۋالدارىن بىلگەن. ىزىنەن جاقسىلىق ىلەسە كەلەتىن قايىرىمدىلىعى مول جاستاردىڭ قارەكەتىنە اعا بۋىن ابدەن رازى بولىپ, العىستارىن ايتىپ, باتالارىن بەرىپتى. جاستار بولسا قۇر قول بارماي, ازىق-ت ۇلىك سەبەتىن الا بارعان. ءسويتىپ ەكى بۋىننىڭ اراسىنداعى ادامگەرشىلىككە نەگىزدەلگەن سىيلاستىقتىڭ التىن ارقاۋى بارىنشا بەكي تۇسكەن.
ەل ىشىندەگى باۋىرمالدىق ارتقان سايىن ادامداردىڭ بويىنداعى بولاشاققا دەگەن سەنىم دە نىعايا تۇسپەك. سونىڭ ءبىر پاراسى ەرىكتىلەردىڭ قولىمەن, قولىمەن عانا ەمەس, اق كوڭىل, ادال نيەتىمەن جاسالىپ جاتىر.
اقمولا وبلىسى