دزيۋدو كۇرەسىنەن بۋداپەشتە ءوتىپ جاتقان الەم چەمپيوناتىنىڭ العاشقى كۇنى عۇسمان قىرعىزباەۆ كۇمىس مەدالدى موينىنا ءىلىپ, بارشا قازاقستاندىق جانكۇيەرلەردى قۋانتسا, كەلەسى تاۋلىكتە ەلدوس جۇماحانوۆتىڭ ونەرىن تاماشالادىق, دەپ حابارلايدى Egemen.kz.
66 كيلو سالماق دارەجەسىندە سىنعا تۇسكەن ەلدوس جۇماحانوۆ العاشقى اينالىمدا سلوۆەنيانىڭ سايىپقىرانى, 2018 جىلعى ەۋروپا چەمپيونى, 2017 جىلعى سول جارىستىڭ كۇمىس جۇلدەگەرى اندرەا گامبوچتى جولىنىن ىعىستىرسا, ىلە-شالا اۋستراليالىق ناتان كاتتس پەن موڭعوليالىق حەرلەن گاندبولدان ايلاسىن اسىردى. بۇل باسەكەلەردىڭ اسا شيەلەنىستى وتكەنى سونشالىق, جەڭىمپازدى انىقتاۋ ءۇشىن قوسىمشا ۋاقىت قاجەت بولدى. بۇل رەتتە قازاق بالۋانى ءوزىنىڭ جانكەشتىلىگى مەن تاباندىلىعىنىڭ ارقاسىندا جەڭىسكە جەتكەنىن ايتا كەتۋگە ءتيىسپىز.
شيرەك فينالدا بەلارۋسسيالىق دميتري مينكوۆتان باسىم تۇسكەن جۇماحانوۆ جارتىلاي فينالدا الەمدىك رەيتينگتىڭ كوشباسشىسى, بيىلعى جىلعى ەۋروپا چەمپيونى, يتاليالىق مانۋەل لومباردومەن ايقاستى. باسەكە بارىسىندا جاراقات العانىنا قاراماستان قانداسىمىز بارىن سالدى. بىراق اپەننين تۇبەگىنىڭ تۇلەگى ءبىزدىڭ جىگىتتىڭ الدىن ورادى. ودان كەيىن ەلدوس قولا مەدال ءۇشىن تالاسۋعا ءتيىس ەدى. الايدا جاراقاتىنا بايلانىستى جۇماحانوۆ تاتاميگە شىقپادى. جەڭىس موڭعوليانىڭ وكىلى يوندونپەرنەنلەي ءباسحۋدىڭ ەنشىسىندە جازىلدى.
ال 52 كيلو سالماقتاعى نۇرسۇلۋ ەراليەۆا ءوزىنىڭ تۇساۋكەسەر كەزدەسۋىندە وليمپيا ويىندارى مەن الەم چەمپيوناتىنىڭ قولا جۇلدەگەرى, ەۋروپا ويىندارىنىڭ جەڭىمپازى, قۇرلىق چەمپيونى, بەلگيالىق شارلين ۆان سنيككە سان سوقتىرعانىمەن, كەلەسى كەزدەسۋدە موڭعوليالىق سوسوربارام لحاگۆاسۋرەنگە ەسە جىبەردى.