ەۋروپالىق وداق بەلارۋسكە تيەسىلى اۋە كومپانيالارىنىڭ قارت قۇرلىقتاعى بارلىق اۋە كەڭىستىگى مەن اۋەجايىن پايدالانۋعا تىيىم سالدى. بۇعان رەسمي مينسكىنىڭ Ryanair كومپانياسىنا تيەسىلى ۇشاقتى بورتتا بومبا بار دەگەن جەلەۋمەن قوندىرىپ, وپپوزيتسيا بەلسەندىسى رامان پراتاسەۆيچتى تۇتقىنداۋى سەبەپ بولدى.
ەۋروپالىق وداق ەلشىلەرى وتكەن جۇمادا وسى ماسەلەگە قاتىستى كەزدەسىپ, ورتاق ۇيعارىمعا كەلگەن ەكەن. سوعان سايكەس بۇدان بىلاي بەلارۋس اۋە كومپانيالارىنىڭ ۇشاقتارىنىڭ قونۋى مەن ۇشۋىنا رۇقسات بەرىلمەيدى. سونداي-اق سەنبىدەن باستاپ 27 مۇشە مەملەكەتتىڭ اۋماعىنان ۇشىپ وتە المايدى.
ەۋروپالىق اۆياتسيالىق قاۋىپسىزدىك اگەنتتىگى (EASA) ەۋروپالىق وداق ەلدەرىنە تيەسىلى ۇشاقتاردىڭ بەلارۋس اۋە كەڭىستىگىندە ۇشۋىن نەمەسە ونىڭ اۋماعىنا قونۋىن شەكتەپ وتىر.
ەستەرىڭىزدە بولسا, رامان پراتاسەۆيچتىڭ تۇتقىندالۋىن حالىقارالىق قوعامداستىق قاتتى سىنعا العان ەدى. ءوز كەزەگىندە ەۋروپالىق وداق بۇعان قاتىستى شارا قابىلدايتىنىن جەتكىزگەن-ءدى.
British Airways بۇرىنعى اتقارۋشى ديرەكتورى, قازىرگى تاڭدا حالىقارالىق اۋە كولىگى قاۋىمداستىعىنىڭ (Iata) باس ديرەكتورى ۆيللي ۋولش اۋە ساياحاتىنىڭ ساياسات قۇرالىنا اينالعانىنا الاڭداۋشىلىق ءبىلدىردى.
«ەۋروپالىق اۋە كەمەلەرىنە بەلارۋس اۋە كەڭىستىگىن پايدالانۋعا تىيىم سالۋ دا – اۆياتسيالىق قاۋىپسىزدىكتى ساياساتتاندىرۋدىڭ كورىنىسى. بۇل اۋە قاتىناسى سالاسىن دامىتپايدى. EASA تىيىم سالۋدى الىپ تاستاپ, اۋە كومپانيالارىنىڭ ادەتتەگىدەي جولاۋشى تاسىمالداۋىنا مۇمكىندىك بەرۋى ءتيىس», دەيدى ول.
وتكەن ايدا ەو باسشىلارى وقيعاعا قاتىسى بار ادامدارعا ەكونوميكالىق سانكتسيا سالۋ جونىندە شەشىم قابىلداعان. ەندى بريۋسسەلدەگى ديپلوماتتار كەلەسى اپتادا شەنەۋنىكتەر مەن ۇيىمداردىڭ ءتىزىمىن ناقتىلاماق.