يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ تۇركياعا اۋە رەيستەرىنىڭ كوبەيۋى تۋرالى ايتتى. ول جاقىن ارادا انتالياعا رەيستەر ماسەلەسى شەشىلەتىنىن ءمالىم ەتتى, دەپ حابارلايدى Egemen.kz
انتاليادا چارتەرلىك اۋە رەيستەرىن جاڭارتۋ جوسپارلانىپ وتىر.
«بۇگىن ءبىز تۇركيامەن اۋە قاتىناسى ماسەلەسىن تالقىلادىق. جازعى كەزەڭ باستالدى جانە ءداستۇرلى تۇردە كوپتەگەن قازاقستاندىق تۇركياعا دەمالىسقا شىعادى. وسىنى ەسكەرە وتىرىپ, ءبىز ۆەدومستۆوارالىق كوميسسياعا بەردىك. سونداي-اق, ماسەلە ءتيىستى ورگاندارمەن, تۇركيا رەسپۋبليكاسىنداعى ارىپتەستەرىمىزبەن پىسىقتالىپ جاتىر. مەنىڭ ويىمشا, جاقىن ارادا ءبىز رەيستەر سانىن كوبەيتەمىز, ءبىرىنشى كەزەكتە بۇل انتاليا بولادى», دەدى اتامقۇلوۆ حالىقپەن ەسەپتىك كەزدەسۋ بارىسىندا.
ونىڭ ايتۋىنشا, ماسەلە ءبىر اپتا ىشىندە شەشىلەدى جانە قازاقستاندىقتار وسى ايدا انتالياعا ۇشۋى دا مۇمكىن.
سونىمەن قاتار, مينيستر بۇگىنگى تاڭدا ىشكى رەيستەر تولىق قالپىنا كەلتىرىلگەنىن, سونداي-اق اپتاسىنا 123 رەيس جيىلىگىمەن 43 باعىت بويىنشا 14 ەلمەن حالىقارالىق رەيستەر رەتتەلگەنىن اتاپ ءوتتى.