اقش-تىڭ فلوريدا شتاتىندا گەنەتيكالىق تۇرعىدا تۇرلەندىرىلگەن ماسالار قورشاعان ورتاعا جىبەرىلدى, دەپ حابارلايدى Egemen.kz FOX13 تەلەارناسىنا سىلتەمە جاساپ.
بۇل ەكسپەريمەنتكە سەبەپكەر Aedes aegypti ماسالارىنىڭ شەكتەن تىس كوبەيۋى. ولار ادامدى شاقسا, دەنگە جانە چيكۋنگۋنيا بەزگەگىن جۇقتىرادى. دەر كەزىندە ەمدەلمەسە ادامدى ەسەڭىگەرتىپ, قان كەتۋىنە اكەلۋى مۇمكىن.
تاجىريبەگە ارنالعان جاندىكتەردى برازيليا, كايمان ارالدارى, پاناما جانە مالايزيا سياقتى ەلدەردە وسىنداي جوبالاردى جۇزەگە اسىرعان بريتاندىق Oxitec كومپانياسى ۇسىندى. ەكسپەريمەنتتەن كەيىن بۇل ەلدەردە ماسا تاراتۋشىلارىنىڭ سانى 90 پايىزعا ازايعان. موديفيكاتسيالانعان ماسالاردىڭ شىعۋى پەستيتسيدتەردى قولدانباي پوپۋلياتسيانى باقىلاۋعا مۇمكىندىك بەرەتىنىن اتاپ وتكەن ءجون.
مۋتانت اتالىق ماسالارعا بولاشاق انالىقتاردىڭ ۆيرۋس تاسىمالداۋشىلارىنىڭ تىرشىلىگىن جوياتىن گەن ەنگىزىلگەن. بۇل جەرگىلىكتى ماسالاردى كوبەيتپەيدى دەپ كۇتىلۋدە.
ايتا كەتەيىك, وسىنداي ماسەلەگە بايلانىستى شتات ۇكىمەتى جىل سايىن زياندى جاندىكتەرمەن كۇرەسۋ ءۇشىن 1 ميلليون دوللار (430 ميلليون تەڭگە) ءبولىپ, اۋە ينسەكتيتسيدتەرىن شاشىراتۋ سياقتى قىمباتقا تۇسەتىن جۇمىستار اتقارىپ كەلگەن.