قازاقستان حوككەي فەدەراتسياسىنىڭ ءباسپاسوز قىزمەتى لاتۆياداعى الەم چەمپيوناتى بارىسىندا جەرلەستەرىمىزدىڭ اراسىنان كىمدەردىڭ دارالانعانى جايىندا مالىمەت تاراتتى, دەپ حابارلايدى Egemen.kz.
وتانداستارىمىزدىڭ اراسىنان رومان ستارچەنكو ەڭ كوپ گول سوقتى. وسكەمەن حوككەي مەكتەبىنىڭ تۇلەگى جەتى كەزدەسۋدە قارسىلاستار قاقپاسىنا ءۇش شايبا ەنگىزىپ, ءتورت رەت وڭتايلى پاس بەردى. ناتيجەسىندە ول 7 ۇپاي جيدى.
قاراعاندى وبلىسىنا قاراستى ساتباەۆ قالاسىنىڭ تۋماسى نيكيتا ميحايليس تە ءۇش گولدىڭ اۆتورى اتانسا, كانادالىق لەگيونەر كەرتيس ۆولكتىڭ كەرەمەت پاستارىنان كەيىن ءبىزدىڭ ويىنشىلار ءتورت مارتە مەرگەندىك تانىتتى.
قورعاۋشىلار اراسىندا ەڭ ۇزدىك كورسەتكىش ۆيكتور سۆەدبەرگكە تيەسىلى. شۆەتسيادان كەلگەن سايىپقىران التى ويىندا 4 ۇپايعا (1 گول+3 پاس) يەلىك ەتتى.
ءاليحان اسەتوۆ ەڭ پايدالى ويىنشىلاردىڭ ءتىزىمىنىڭ الدىڭعى لەگىنەن كورىندى. الەمدىك دوداعا قانداسىمىزدىڭ ونەرى +3 دەگەن باعاعا يە بولدى.
ارتيوم ليحوتنيكوۆ قارسىلاستار قاقپاسىنا ءتورت سوققى باعىتتاپ, سونىڭ ەكەۋىندە شايبا توردان تابىلدى.
داررەن ديتس ءار ماتچ بارىسىندا 26 مينۋت 16 سەكۋند بويى مۇز ايدىنىندا ويقاستادى. سونداي-اق, ول جەتى كەزدەسۋدە 27 سوققى جاسادى. بىراق ولاردىڭ بىردە-بىرەۋى ناتيجەلى بولمادى.
قاقپاشى نيكيتا بوياركين التى ويىندا ورتا ەسەپپەن 2,27 شايبا جىبەرىپ الدى. ول ءوز قاقپاسىنا باعىتتالعان سوققىلاردىڭ 92,93 پايىزىنا توسقاۋىل قويا ءبىلدى.
ال جارىستىڭ وزىنە كەلەر بولساق, ول ءالى جالعاسۋدا. بۇگىن شۆەيتساريا مەن گەرمانيا, اقش پەن سلوۆاكيا, رەسەي مەن كانادا جانە فينليانديا مەن چەحيا قۇرامالارى اراسىندا شيرەك فينالدىق سايىستار وتەدى.