قازاقستاندا جايىلىم تاپشىلىعىن شەشۋگە ىقپال ەتەتىن نورمالار زاڭناماعا ەنگىزىلەدى. بۇل تۋرالى پارلامەنت ءماجىلىسىنىڭ توراعاسى نۇرلان نىعماتۋلين ايتتى, دەپ حابارلايدى Egemen.kz.
بۇگىن پالاتانىڭ جالپى وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارىن دامىتۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى ءبىرىنشى وقىلىمدا ماقۇلداندى.
«بۇل قۇجات مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن ازىرلەندى. وسى زاڭ جوباسى بويىنشا ەڭ الدىمەن حالقىمىزدىڭ نازارىندا جۇرگەن وتە ماڭىزدى جەر ماسەلەسى بويىنشا ناقتى شەشىم قابىلداندى. ەڭ باستىسى, اۋىل شارۋاشىلىعى ماقساتىنداعى جەرلەردى جالعا بەرۋ زاڭمەن بەكىتىلدى. وسى ماسەلەگە قاتىستى قوعامدا ءارتۇرلى پىكىرلەر مەن ويلار ايتىلدى. ەندى جەردى جەكەمەنشىككە بەرۋ 5 جىلعا توقتاتىلادى. جالپى, زاڭ جوباسى جەكە مال جايۋ ءۇشىن قاجەتتى جايىلىم تاپشىلىعىن شەشۋگە دە ىقپال ەتەدى. سونىمەن بىرگە جەردى پايدالانۋ جانە قورعاۋعا باقىلاۋدى كۇشەيتەدى. جەر ۋچاسكەلەرى بويىنشا اقپاراتتىڭ اشىقتىعى دا ارتاتىن بولادى», دەدى ن.نىعماتۋلين.
زاڭ جوباسىنىڭ نەگىزگى وزگەرىستەرى مەن تولىقتىرۋلارى:
- قازاقستاندىقتارعا جانە قازاقستاندىق زاڭدى تۇلعالارعا اۋىل شارۋاشىلىعى ماقساتىنداعى جەرلەردى 49 جىلعا دەيىنگى مەرزىمگە جالعا بەرۋ;
- كەلەسى, جالعا الۋ مەرزىمى اياقتالعان كەزدە ونى جاڭا مەرزىمگە ۇزارتۋ قۇقىعىن بەرۋ;
- مەملەكەتتەن ساتىپ الماي, جەر پايدالانۋشىلار اراسىندا اۋىل شارۋاشىلىعى ماقساتىنداعى جەرگە جالداۋ قۇقىعىن يەلىكتەن شىعارۋ. بۇل رەتتە, ولاردى پايدالانۋ مەرزىمى كەمىندە 5 جىل, سونداي-اق جەر قاتىناستارى ورگاندارىن حابارلاۋ مىندەتتى شارت بولىپ سانالادى;
- جەر رەسۋرستارىن باسقارۋ كوميتەتىنە جەردى پايدالانۋ مەن قورعاۋدى مەملەكەتتىك باقىلاۋ فۋنكتسيالارىن اكىمدىكتەردەن قايتارۋ;
- اۋىل شارۋاشىلىعى جەرلەرىنىڭ نىسانالى ماقساتىن «باعباندىق» جانە «ساياجاي قۇرىلىسىنا» وزگەرتۋگە تىيىم سالۋ;
- حالىقتىڭ مۇقتاجىن قاناعاتتاندىرۋ ماقساتىندا, جەرگىلىكتى جاعدايلاردى ەسكەرە وتىرىپ, جايىلىمداردى باسقارۋ جونىندەگى جوسپارلاردا, قاجەتتى جايىلىم القابىنىڭ شەكاراسىن ايقىنداۋ;
- اۋىل شارۋاشىلىعى ماقساتىنداعى جەرلەردى جەكە مەنشىككە بەرۋگە ءموراتوريدىڭ قولدانىلۋ مەرزىمىن 2026 جىلعى 31 جەلتوقسانعا دەيىن ۇزارتۋ.