سەنات توراعاسىنىڭ ورىنباسارى اسقار شاكىروۆ بۇۇ ادام قۇقىقتارى جونىندەگى جوعارعى كوميسسارى باسقارماسىنىڭ ورتالىق ازياداعى وڭىرلىك وكىلى رىشارد كومەندامەن كەزدەسۋدە قازاقستان مەن وسى ۇيىم ىنتىماقتاستىعىنىڭ كەلەشەگىن تالقىلادى, دەپ حابارلايدى Egemen.kz.
توراعا ورىنباسارى اڭگىمە بارىسىندا مەملەكەت باسشىسىنىڭ باستاماسى بويىنشا ەلىمىزدە ىسكە اسىپ جاتقان ماڭىزدى ساياسي جاڭارۋلاردى, ونىڭ ىشىندە زاڭناماداعى سايلاۋ تۋرالى بەلگىلى وزگەرىستەردى وڭىرلىك وكىلگە تانىستىردى. سونداي-اق ەلىمىز ازاماتتارىنىڭ ۇسىنىستار ەنگىزۋ جونىندەگى ونلاين-پەتيتسيالارىن زاڭنامالىق رەسىمدەۋ باستاماسىنا, سونداي-اق ازاپتاۋلارعا قارسى كۇرەس, ادام ساۋداسى, بالالاردى كيبەربۋللينگتەن قورعاۋ تۋرالى زاڭنامانى جەتىلدىرۋگە نازار اۋدارىلدى.
اسقار شاكىروۆ پرەزيدەنتتىك ساياسي رەفورمالاردىڭ ءۇشىنشى توپتاماسىندا كوزدەلگەن «قازاقستان رەسپۋبليكاسىنداعى ادام قۇقىقتارى جونىندەگى ۋاكىل تۋرالى» زاڭ جوباسى تۋرالى حاباردار ەتتى.
«قۇجاتتا ادام قۇقىقتارى جونىندەگى ۋاكىل مارتەبەسىنە, سايلاۋ تارتىبىنە جانە ونىڭ قىزمەتىنىڭ پرينتسيپتەرىنە ەرەكشە ءمان بەرىلەدى. ۋاكىلدىڭ وكىلەتتىكتەرى ەداۋىر كەڭەيتىلەدى, بۇل وعان جالپىعا تانىلعان حالىقارالىق ستاندارتتارعا, ەڭ الدىمەن پاريج قاعيداتتارىنا سايكەس مەملەكەتتىڭ ساياسي-قۇقىقتىق جۇيەسىندە ءتيىستى ورىن الۋعا مۇمكىندىك بەرەدى.
ەلىمىزدىڭ بارلىق وڭىرلەرىندە ومبۋدسمەن وكىلدەرىن قۇرۋ كوزدەلگەن. زاڭ جوباسى حالىقارالىق جانە قۇقىق قورعاۋ سالاسىنداعى ۇكىمەتتىك ەمەس ۇيىمداردىڭ قاتىسۋىمەن قازاقستان رەسپۋبليكاسىنداعى ادام قۇقىقتارى جونىندەگى ۋاكىل جانىنداعى ساراپشىلىق كەڭەستىڭ وتىرىسىندا تانىستىرىلدى. قۇجات جاريا تالقىلاۋ ءۇشىن سەناتتىڭ سايتىنا ورنالاستىرىلدى», دەدى سەنات توراعاسىنىڭ ورىنباسارى.
قۇقىق قورعاۋ سالاسىنداعى 2021-2022 جىلدارعا ارنالعان باسىم مىندەتتەرىنىڭ قاتارىندا قازاقستاننىڭ بۇۇ بالا قۇقىقتارى تۋرالى كونۆەنتسياسىنا حابارلاۋ راسىمىنە قاتىستى فاكۋلتاتيۆتىك حاتتاماعا جانە بۇۇ مۇگەدەكتەردىڭ قۇقىقتارى تۋرالى كونۆەنتسياسىنا فاكۋلتاتيۆتىك حاتتاماعا قوسىلۋى اتاپ ءوتىلدى. وسى حالىقارالىق قۇجاتتارعا قوسىلۋ جونىندەگى ءتيىستى جول كارتالارى ازىرلەندى.
اقجكب وكىلى قازاقستاندا بولىپ جاتقان وزگەرىستەردى جوعارى باعالادى جانە ۇلتتىق قۇقىق قورعاۋ مەكەمەسىنىڭ قىزمەتىنە قاجەتتى كومەك كورسەتۋگە ازىرلىگىن ءبىلدىردى.
كەزدەسۋ قورىتىندىسى بويىنشا قۇقىق قورعاۋ جوبالارى اياسىندا ءوزارا ءىس-قيمىلدى نىعايتۋعا نيەت ءبىلدىرىلدى.