«نۇر-سۇلتان-پەتروپاۆل» تاس جولىندا كولىك اپاتىنان ەكى ادام قايتىس بولدى

«30 مامىردا بۇلاندى اۋدانىنىڭ پوليتسيا بولىمىنە 25 جاستاعى نۇر-سۇلتان قالاسىنىڭ تۇرعىنى حابارلاسىپ, «نۇر-سۇلتان-پەتروپاۆل» تاس جولىنىڭ 138 شاقىرىمىندا جول اپاتى بولعانى تۋرالى جەتكىزدى», دەلىنگەن اقمولا وبلىسى پوليتسيا دەپارتامەنتىنىڭ ءباسپاسوز قىزمەتى تاراتقان اقپاراتتا. 

الدىن الا بولجام بويىنشا, نۇر-سۇلتان باعىتىندا كەلە جاتقان Volkswagen Polo اۆتوكولىگىنىڭ 30 جاستاعى جۇرگىزۋشىسى رۋلگە يە بولا الماي, 25 جاستاعى جىگىت جۇرگىزىپ كەلە جاتقان Mercedes Benz جۇك كولىگىمەن سوقتىعىسقان. Volkswagen Polo اۋدارىلىپ قالدى. 

«اپات سالدارىنان Volkswagen Polo اۆتوكولىگىنىڭ جولاۋشىلارى وقيعا ورنىندا قايتىس بولدى. كولىكتە 67 جاستاعى ەر ادام مەن 56 جاستاعى ايەل بولعان. ەكەۋى دە استانانىڭ تۇرعىندارى», دەپ حابارلادى پد.

سونىمەن قاتار Volkswagen Polo كولىگىنىڭ 4 جاسار جولاۋشىسى اقكول اۋدانىنىڭ ورتالىق اۋرۋحاناسىنا اۋىر جاراقاتپەن جەتكىزىلگەن.