پاريجدە «ۇلكەن دۋلىعا» ساناتىنداعى جارىستاردىڭ ءبىرى – «رولان گارروس» باستالدى. جۇلدە قورى 34 367 216 ەۆرونى قۇرايتىن تۋرنيردە قازاقستاننىڭ بەس تەننيسشىسى باق سىناۋدا, دەپ حابارلايدى Egemen.kz.
جارىستىڭ العاشقى كۇنى قوس جەرلەسىمىز ونەر كورسەتتى. الەمنىڭ 24 راكەتكاسى ەلەنا رىباكينا فرانتسيالىق ەلزا جاكەمومەن كەزدەستى. WTA تىزىمىندە «توپ-500» ويىنشىنىڭ قاتارىنا ازەر ەنىپ وتىرعان 18 جاسار ارۋ تاجىريبەلى تەننيسشىگە ايتارلىقتاي قارسىلىق كورسەتە العان جوق. 1 ساعات 12 مينۋتقا سوزىلعان باسەكە 6:4, 6:1 ەسەبىمەن اياقتالدى. كەلەسى اينالىمدا رىباكينا ۇزدىكتەر تىزىمىندە 82 ساتىعا جايعاسقان جاپونيالىق ناو حيبينومەن شەبەرلىك بايقاسادى.
وكىنشكە قاراي, ميحايل كۋكۋشكين العاشقى اينالىمنان اسا المادى. ءۇش سەتتىك سايىستا ول يسپانيالىق الەحاندرو داۆيدوۆيچ-فوكيناعا ەسە جىبەردى – 4:6, 4:6, 3:6.
بۇگىن الەكساندر بۋبليك رەسەيلىك دانيل مەدۆەدەۆپەن, زارينا دياس ۇلىبريتانيالىق حيزەر ۋوتسونمەن جانە يۋليا پۋتينتسەۆا تۋنيستىك ونس جابەرمەن كەزدەسەدى.