ەلوردالىق دارىگەرلەر ينسەكتىك اللەرگياسى بار بالالاردىڭ ستاتسيونارلارعا جۇگىنۋ جاعدايى جيىلەپ كەتكەنىن مالىمدەدى, دەپ حابارلايدى Egemen.kz.
№1 كوپبەيىندى قالالىق بالالار اۋرۋحاناسىنىڭ دارىگەرلەرىنىڭ ايتۋىنشا, اتالمىش اللەرگيالىق رەاكتسيا جاندىكتەردىڭ شاعىپ الۋىنان بولادى.
«انتيگەندەر – جاندىكتەردىڭ, دەرناسىلدەردىڭ دەنەسىنىڭ بولشەگى, ۋى, سىلەكەيى سەكىلدى وزگە دە ينسەكتىكتيۆتى كومپونەنتتەرى. بۇل اللەرگيا نەگىزىنەن شاعىپ العان كەزدە پايدا بولادى. سول سياقتى شاعاتىن جاندىك تەرىسىنىڭ ءبىر قاباتى مۇرىن ارقىلى اعزاعا تۇسكەندە بولادى. بۇدان بولەك بال, ءدارى-دارمەكتەر, ناقتىراق ايتقاندا شاعاتىن جاندىكتەردىڭ ازىعى بولىپ ەسەپتەلەتىن ءپروپوليستى قولدانعاندا شىعادى», دەيدى يممۋنولوگ-دارىگەر, اللەرگولوگ نۇرلان وتەلباەۆ.
دارىگەر اللەرگيالىق رەاكتسيالار جەرگىلىكتى جانە جۇيەلىك بولىپ بولىنەتىنىن اتاپ ءوتتى. ونىڭ ايتۋىنشا, جاندىكتەردىڭ شاققاننان كەيىن ورنى اۋىرسىنىپ, وتپەلى ەريتەما بولاتىنىن جانە كىشكەنتاي ءىسىنۋ بولاتىنىن جەتكىزدى.
دارىگەرلەر شاققان ورىنعا جانە ونىڭ اينالاسىنا سۋىق نارسە قويىپ, مەديتسينالىق كومەككە جۇگىنۋ كەرەكتىگىن ەسكەرتەدى. شاعۋ ىقتيمالدىعىن بولدىرماۋ نەمەسە ەداۋىر ازايتۋ ءۇشىن مىناداي ساقتىق شارالارىن ساقتاۋ كەرەك:
- سىرتقا شىققاندا بارىنشا جابىق كيىممەن شىعۋ;
- ءشوپ ۇستىندە جالاڭ اياق جۇرمەۋ (جاندىكتى باسىپ كەتۋ قاۋپى جوعارى);
- ءپروپوليستى ەمدىك ءۇشىن قولدانۋعا بولمايدى;
- ومارتالار مەن بازارلارعا, پيكنيكتەرگە بارماۋ;
- فيزيكالىق كۇش سالىپ جۇمىس ىستەۋگە بولمايدى (ادام دەنەسىنەن ءبولىنىپ شىققان تەر جاندىكتەردى تارتادى);
- جاندىكتەردىڭ ۇيالارى شوپتەردە, بۇتالاردا, شاتىرلاردا, نازاردان تىس قالعان ورىنداردا بولۋى مۇمكىن ەكەنىن ۇمىتپاڭىز;
- جاندىكتى ءوز ۇياسىنىڭ جانىندا ولتىرۋگە بولمايدى;
- پارفيۋمەريا, لاك, كرەم پايدالانباڭىز, ويتكەنى ولاردىڭ ءيىسى جاندىكتەردى تارتادى;
- اراعا نەمەسە ارانىڭ قاسىندا تۇرىپ جىلدام قوزعالىس جاساماڭىز;
- باس كيىم كيۋدى ۇمىتپاڭىز, ويتكەنى شاشقا ورالعان جاندىك مىندەتتى تۇردە شاعىپ الادى.