ءماجىلىس توراعاسى نۇرلان نىعماتۋلين بەلگيا كورولدىگى فەدەرالدىق پارلامەنتى وكىلدەر پالاتاسىنىڭ سپيكەرى ەليان تيليومەن بەينەكونفەرەنتسيا فورماتىندا كەزدەسۋ وتكىزدى, دەپ حابارلادى وسى پالاتانىڭ ءباسپاسوز قىزمەتى.
تاراپتار ەكى ەل اراسىنداعى ىنتىماقتاستىقتى, ونىڭ ىشىندە پارلامەنتارالىق بايلانىستى ارتتىرۋ جايىندا پىكىر الىستى.
نۇرلان نىعماتۋلين بەلگيا قازاقستاننىڭ ەۋروپاداعى ماڭىزدى ساياسي جانە ەكونوميكالىق ارىپتەسى ەكەنىنە نازار اۋدارا وتىرىپ, ەكى ەل اراسىنداعى ستراتەگيالىق سەرىكتەستىك دەڭگەيىنە جەتۋدەگى تۇڭعىش پرەزيدەنت – ەلباسى نۇرسۇلتان نازارباەۆتىڭ ءرولىن اتاپ ءوتتى.
سونىمەن قاتار كەزدەسۋدەگى نەگىزگى تاقىرىپتاردىڭ ءبىرى – مەملەكەت باسشىسى قاسىم-جومارت توقاەۆ باستاماشى بولعان ەلدىڭ ساياسي جۇيەسىن جاڭعىرتۋ ماسەلەلەرى تۋرالى بولدى.
وتىرىستا نۇرلان نىعماتۋلين مەملەكەت پەن قوعام اراسىنداعى ديالوگتى كەڭەيتۋ, سونداي-اق پرەزيدەنتتىڭ ساياسي رەفورمالارىنداعى نەگىزگى ماسەلەلەر – ميتينگ جانە سايلاۋ تۋرالى زاڭدار جايىندا ايتتى.
تاراپتار قازاقستان-بەلگيا قارىم-قاتىناستارىنىڭ ماڭىزدى قۇرامداس بولىگى رەتىندە پارلامەنتارالىق بايلانىستى جانداندىرۋدى قولدادى.
ءوز كەزەگىندە ەليان تيليو قازاقستان – ءوزىنىڭ دامۋ جولىن ۇسىنعان مەملەكەت ەكەنىن, بۇگىنگى تاڭدا قارقىندى تۇردە دامىپ كەلە جاتقانىن العا تارتتى. سونىمەن قاتار قوس مەملەكەت اراسىنداعى ديپلوماتيالىق قاتىناستىڭ ورناعانىنا 30 جىل تولاتىنىن اتاپ ءوتىپ, قالىپتاسقان ساياسي-ەكونوميكالىق بايلانىستى ودان ءارى نىعايتۋعا نيەتتى ەكەنىن جەتكىزدى.
كەزدەسۋ بارىسىندا نۇرلان نىعماتۋلين مەن ەليان تيليو زاڭنامالىق تاجىريبە الماسۋ, ىنتىماقتاستىق جونىندەگى پارلامەنتتىك توپتار مەن كوميتەتتەردىڭ ءوزارا ءىس-قيمىلى ەكى ەلدىڭ جان-جاقتى ارىپتەستىگىن ىلگەرىلەتۋگە ىقپال ەتەتىنىنە سەنىم ءبىلدىردى.