بۋگيۆال – ءپاريجدىڭ باتىس ماڭىنداعى شاعىن اۋدان عانا ەمەس, يمپرەسسيونيزمنىڭ بەسىگى. سول داۋىردەگى شىعارماشىل توپتى ىزدەسەڭىز, بىردەن بۋگيۆالدىقتاردان سۇراڭىز. سىزگە تاريحىن تارقاتىپ بەرەدى. ءيا, XIX عاسىر – ويلى عاسىر. اسىرەسە پەر وگيۋست رەنۋار ءۇشىن ءساتتى جىلداردىڭ شەرۋىنە ۇلاستى. بىراق نەگە ەكەنىن بىلمەيمىن, پاريجدىكتەر ءۇشىن وسىناۋ كەسكىندەمە يۆان تۋرگەنەۆتى ەسكە تۇسىرەدى. سەبەبى سول جىلى فرانتسيانىڭ استاناسىندا اتاقتى اقىن دۇنيەدەن وزعان بولاتىن. سۋرەتتىڭ ءبىر سيقىرى سوندا بولسا كەرەك.
1883 جىلى داڭقتى سۋرەتشى پەر وگيۋست رەنۋار كوللەكتسيونەر ءارى مەتسەنات پول ديۋران-رۋەلدەن ارنايى تاپسىرىس الادى. سونىڭ ناتيجەسىندە, «بۋگيۆالداعى بي» كارتيناسى دۇنيەگە كەلەدى. تاپسىرىس بەرۋشى جالپى تاقىرىپ بويىنشا بىرىكتىرىلگەن ءۇش پولوتنونىڭ يەسى بولۋدى قالايدى. ياكي جۇپتىق بيلەردىڭ ءۇش سيپاتىن كورگىسى كەلەدى.
تاپسىرىس تۇسە سالىسىمەن, شەبەر قىزۋ جۇمىسقا كىرىسىپ كەتتى. العاشىندا ول اشىق اسپان استىنداعى بيشىلەردىڭ بىرنەشە جۇبىن بەينەلەيدى. ارتىنان بيشىلەر سانىن ەكى ادامعا دەيىن قىسقارتادى. دەسە دە ءبىز كەنەپ بەتىنەن ناقتى ءبىر جۇپتى جانە ولاردى قورشاعان ورتانى كورەمىز. ءبىرىنشى پلاندا ەرلى-زايىپتىلار – قالادا, ەكىنشىسىندە – قالا ماڭىندا, ال ۇشىنشىسىندە اۋىلدا بيلەيدى. سودان با كارتينا كورەرمەندى XIX عاسىرعا قايتا ەرتىپ اپارادى. بۋگيۆالداعى بي كەشى پاريجدىكتەر مەن قالا قوناقتارىنىڭ اراسىندا وتە تانىمال بولعان. ادامدار وندا دوستارىمەن جايلى كافەدە وتىرۋعا, اعاشتاردىڭ كولەڭكەسىندە تازا اۋامەن تىنىستاۋعا جانە جاڭا تانىستار تابۋعا كەلەدى ەكەن. بۋگيۆال ءوزىنىڭ كەرەمەت پەيزاجدارىمەن كوپتەگەن سۋرەتشىنى, سونىڭ ىشىندە يمپرەسسيونيستەردى ەرەكشە قىزىقتىردى.
كەنەپتە جاس قىز بەن ورتا جاستاعى ەر ادام بەينەلەنگەن. قىزدىڭ كيىمى ونىڭ سۇلۋلىعىنا ەرەكشە نازار اۋدارتادى. اقشىل قىزعىلت رەڭكتى ءساندى كويلەك كيگەن ارۋدىڭ بەت-اجارى ازداپ قىزارىپ تۇر. ەكى كەيىپكەر ءبىر-بىرىنە ادەمى ۇيلەسەدى. تاۋدان قۇلاعان سارقىراماداي كويلەكتىڭ ەتەگى تولقىندانىپ, قوزعالىستى جانداندىرىپ تۇر. بويجەتكەننىڭ باسىنداعى قىزىل بۇرشىكتەرى بار گۇل شوقتارىمەن بەزەندىرىلگەن شلياپا الىستان كوزگە تۇسەدى. سوعان ساي سەرى جىگىت باسىنا سابان ءتۇستى شلياپا, ۇستىنە قارا كوستيۋم شالبار كيگەن. باس كيىم وقىرمانداردان ءبيشىنىڭ بەت-ءجۇزىن جاۋىپ تۇر, تەك ساقال-مۇرتى عانا كورىنەدى. ەگەر ونەر سىنشىلارى قىزدىڭ شىنايىلىعىنا كۇمانمەن قاراسا, بۋگيۆالدىڭ ەڭ سۇلۋ بيكەشى سيۋزاننا ۆالادونمەن تانىسسا بولادى. ەڭ قىزىعى, كەسكىندەمەدەگى ەر ادامدار سۋرەتشىنىڭ ونەردەگى دوستارى ەدى.
سۇڭعىلا سۋرەتشىنىڭ مودەلى سيۋزاننا ۆالادون كەيىنىرەك ءوزى دە بەلگىلى سۋرەتشىگە اينالادى. بەرتىن كەلە رەنتگەنوگرافيا مەن ينفراقىزىل رەفلوگرافيانى قولدانۋ ارقىلى جۇرگىزىلگەن زەرتتەۋلەر ناتيجەسىندە سۋرەتكە باستاپقىدا تاعى ءبىر ايەلدىڭ سۇلباسى سىزىلعانى بەلگىلى بولدى. ونى كوبىسى رەينۋاردىڭ بولاشاق ايەلى الين چاريگوتاعا ۇقساتۋدا. كىم بىلەدى؟ بىراق سۋرەتشى سۇلۋلاردان شابىت العانى كورىنىپ-اق تۇر.
اتالعان كارتينا تۇسىنۋگە ۇعىنىقتى, جەڭىلدىگىمەن ءارى جايلىلىعىمەن ەرەكشە. بي جۇپتارى اشىق اسپان اياسىندا جازعى كافە ۇستەلدەرىندە وتىرعان ادامداردىڭ فونىندا بەينەلەنگەن. ەكىنشى, ءۇشىنشى پلانداعى كەيىپكەرلەردىڭ بەتى ب ۇلىڭعىر. ال اعاش بۇتاقتارىنداعى جاسىل جاپىراقتاردىڭ بۋىلدىر تارتىپ, ساعىمدانىپ كەلۋى قىز بەن جىگىتتىڭ ءبىر-بىرىنە دەگەن قيمىل سەزىمىن شىنايى جەتكىزۋگە مۇمكىندىك بەرەدى. بۇل سۋرەتشىنىڭ ءوز ءادىسى. بۇكىل ساحنا كۇن ساۋلەسىمەن تولىپ, مەرەكەلىك اتموسفەرا جاساپ تۇر.
ايتپاقشى, رەنۋاردىڭ سيۋزاننا ۆالادون ءۇشىن ارنايى جازعان تۋرا وسىنداي قىسقارتىلعان اۆتورلىق كوشىرمەسى بار. وندا تۇپنۇسقا تولىعىمەن قايتالانادى, بىراق سۋرەتشى جاس ءبيشىنىڭ نۇرلى ديدارىن تولىق بەرۋگە تىرىسقان ەكەن. ول نۇسقادا سيۋزاننانىڭ بەينەلەنگەندىگىنە ەشكىم كۇمان كەلتىرە الماسى انىق. بۇگىندە بۇل كوشىرمە امەريكا قۇراما شتاتتارىنىڭ جەكە كوللەكتسيونەرىنىڭ بىرىنە تيەسىلى.
قازىرگى تاڭدا تاپسىرىس بەرۋشىسى پول ديۋران-رۋەلدىڭ كوللەكتسياسىنان الىنعان «بۋگيۆالداعى بي» كارتيناسىنىڭ تۇپنۇسقاسى بوستونداعى بەينەلەۋ ونەر مۇراجايىندا ورنالاسقان. مۋزەي باسشىلىعى ايگىلى تۋىندىنى 1937 جىلى 150 مىڭ دوللارعا ساتىپ العان ەكەن. وسى سەرياداعى تاعى ەكى پولوتنو قازىر پاريجدەگى ورەسەي مۋزەيىندە تۇر. الدەقالاي ماحاببات قالاسىنا ساياحاتتاپ بارساڭىز, عاجايىپ ونەر تۋىندىسىن تاماشالاۋىڭىزعا بولادى.
تاپسىرىس ارقىلى تاڭعاجايىپ تۋىندىنى ومىرگە اكەلگەن قىلقالام شەبەرىنىڭ ەڭبەگى الەمدى تاڭ-تاماشا ەتتى. اسىرەسە پاريجدىك وقىرمانداردى. شىعارماداعى سۇلۋدىڭ شىرايى جانە ونىڭ بيازى كەيپى تۇتىنۋشىنى دا تاڭعالدىرعان كورىنەدى. ال الەم ادەبيەتشىلەرى پەر وگيۋست رەنۋاردىڭ «بۋگيۆالداعى بي» كارتيناسى جارىققا شىققان جىلى يۆان تۋرگەنەۆتەن ايىرىلىپ قالعانىن ايتادى ەكەن. كوزى تىرىسىندە قايسار قالامگەر بۋگيۆالداعى بي كەشىنە تالاي مارتە قاتىسىپتى.