الماتى قالاسىندا ورنالاسقان ورتالىق ساياباقتاعى ۆەلوترەك قايتا قالپىنا كەلتىرىلىپ جاتىر. قازاقستاننىڭ ۆەلوسيپەد سپورتى فەدەراتسياسىنىڭ باستاماسىمەن قۇرىلىسقا «استانا موتورس» كومپانياسى دەمەۋشىلىك ەتىپ وتىر, دەپ حابارلايدى Egemen.kz.
40 جىلدىق تاريحى بار سپورت الاڭى ۇزاق ۋاقىت بويى جۇمىس ىستەمەي تۇرعان. سەبەبى ۆەلوجولدار ەسكىرىپ, سپورتشىلاردىڭ جاتتىعۋىنا ىڭعايسىزدىق تۋدىرعان. سول سەبەپتى فەدەراتسيا قايتا جوندەپ, وسى كۇزدە قولدانىسقا بەرەدى.
1,17 گەكتار اۋماقتى الىپ جاتقان ۆەلوترەكتىڭ جولدارى تولىقتاي جاڭارتىلىپ, ورتاسىندا زاماناۋي BMX-ساياباعى سالىنادى. جوندەۋ جۇمىستارى تولىقتاي اياقتالعان سوڭ ءبىر ۋاقىتتا 60-80 جۋىق كاسىبي سپورتشى ءۇش الاڭدا جاتتىعا الادى. ايتا كەتەيىك مۇندا كاسىبي سپورتشىلاردان بولەك قاراپايىم قالا تۇرعىندارى دا سپورتپەن شۇعىلدانسا بولادى.
ء«بىز, اسىرەسە, بالالار سپورتى مەن بۇقارالىق سپورتقا باسىمدىق بەرىپ وتىرمىز. جاسوسپىرىمدەرىمىز كوشەدە جۇرمەي, ويىن الاڭدارىندا ۋاقىت وتكىزسە دەگەن نيەتىمىز بار. ولاردىڭ اراسىندا دارىندى بالالار بولۋى مۇمكىن, ولارعا بارلىق جاعدايدى جاساپ, تالانتتارىنىڭ اشىلۋىنا مۇمكىندىك جاساعىمىز كەلەدى», دەيدى قازاقستاننىڭ ۆەلوسيپەد سپورتى فەدەراتسياسىنىڭ باسشىسى نۇرلان سماعۇلوۆ.
جوندەۋ جۇمىستارىنىڭ بارىسىمەن مادەنيەت جانە سپورت ۆيتسە-ءمينيسترى ەرلان قوجاعاپانوۆ تانىسىپ, جاس سپورتشىلارمەن كەزدەستى. مادەنيەت جانە سپورت ۆيتسە-ءمينيسترى ۆەلوسپورتتىڭ ماڭىزىنا توقتالىپ, بۇل كوپ مەدال جەڭۋگە مۇمكىندىك بەرەتىن, سوندىقتان ونى دامىتۋ ارقىلى ەلىمىزدىڭ ءيميدجى قالىپتاساتىندىعىن اتاپ ءوتتى.
«ۆەلوترەك الەمدىك ستاندارتتارعا ساي جوندەلەدى دەپ جوسپارلانعان, وسىلايشا مۇندا تەك جاتتىعىپ قانا قويماي, حالىقارالىق جارىستار وتكىزە الامىز. دەگەنمەن, ەڭ باستىسى بالالارىمىزدىڭ, كىشكەنتاي سپورتشىلارىمىزدىڭ تولىققاندى سپورتپەن شۇعىلدانۋىنا مۇمكىندىك جاساۋ ءۇشىن جاسىلىپ جاتقان دۇنيە», دەيدى ەرلان قوجاعاپانوۆ.
ەستەرىڭىزگە سالا كەتەيىك, قازاقستاننىڭ ۆەلوسيپەد سپورتى فەدەراتسياسى بۇقارالىق جانە بالالار سپورتىن دامىتۋ باعدارلاماسى اياسىندا ەلىمىزدىڭ بارلىق ايماقتارىندا 13 ساياباق سالۋدى جوسپارلاپ وتىر. بۇگىنگى تاڭدا الماتى قالاسىنداعى «حالىق ارەنا» كەشەنىنىڭ اۋماعىندا BMX-ساياباعىنىڭ قۇرىلىسى باستالدى.