الەۋمەتتىك نىساندار قۇرىلىسىمەن تانىستى

ريددەردەگى الاپات ءورتتىڭ سالدارىنان باسپاناسىز قالعان قالا تۇرعىندارىمەن كەزدەسكەن ۇكىمەت باسشىسى جاقىن ارادا ولاردىڭ جاڭا تۇرعىن ۇيمەن قامتاماسىز ەتىلەتىنىن ايتتى. قۇرىلىس باسىندا بولىپ, جۇمىستىڭ ساپاسىنا دا نازار اۋداردى.

– مەملەكەت باسشىسى قاسىم-جومارت توقاەۆتىڭ تاپسىرماسى بويىنشا ريددەر قالاسىندا بولعان ورتتەن زارداپ شەككەن بارلىق وتباسى جاقىن ارادا جاڭا تۇرعىن ۇيمەن قامتاماسىز ەتىلەدى. ۇكىمەت پەن شىعىس قازاقستان وبلىسىنىڭ اكىمدىگى مەملەكەت باسشىسىنىڭ تاپسىرمالارىن جۇزەگە اسىرۋ ءۇشىن بارلىق قاجەتتى شارانى قابىلداپ جاتىر, – دەدى اسقار مامين.

ورتتەن زارداپ شەككەن وتباسىلارعا ارنالعان 30 جاڭا تۇرعىن ءۇيدىڭ قۇرىلىسى توتەنشە جاعدايلار سالدارىن جويۋ ءۇشىن قاراستىرىلعان ۇكىمەت رەزەرۆىنىڭ قاراجاتى ەسەبىنەن جاڭا «بوتانيكا ءۇشىنشى تۇرعىن ءۇي اۋدانىندا» جۇرگىزىلۋدە. ءار ءۇيدىڭ اۋدانى – 80 شارشى مەتر, ال ءۇي ماڭىنداعى جەكە ۋچاسكە كولەمى – 10 سوتىق.

ايتا كەتسەك, ريددەر قالاسىندا بولعان ءورتتىڭ سالدارىن جويۋ ءۇشىن 557,5 ملن تەڭگە بولىنگەن. قۇرىلىس جۇمىستارىن «وبل­شى­عىسجول», VK Invest Company, QK Sunqar, «ۆوستوكۆزرىۆپروم», Kazprofstroy Holding كومپانيالارى جۇرگىزىپ جاتىر.

جوسپارعا سايكەس ۇيلەردىڭ قۇرىلىسى وسى جىلدىڭ 15 تامىزىنا قاراي اياقتالادى. ءۇيدىڭ ءوزى عانا ەمەس, سونىمەن قاتار بارلىق قا­جەتتى ينجەنەرلىك-كوممۋنيكاتسيالىق ينفرا­قۇ­رىلىمى تولىقتاي جۇرگىزىلەدى.

بۇدان كەيىن ا.ما­مين اتتىڭ باسىن وب­لىس­تىڭ كولىك ينفراقۇ­رىلىمى, تاۋ-كەن مەتاللۋرگيا ونەركاسىبى, اگرو­ونەركاسىپتىك كەشەن نىساندارىنا بۇردى. دەنساۋلىق ساقتاۋ سالاسىنداعى ءىرى ينۆەس­تي­تسيالىق جوبالاردىڭ ىسكە اسىرىلۋىن دا نازاردان تىس قالدىرمادى.

اياگوز قالاسىندا ۇكىمەت باسشىسىنا «تال­دىقورعان – وسكەمەن» (768 كم), «قالباتاۋ – مايقاپشاعاي» (415 كم) جانە ء«ۇشارال – دوستىق» (180 كم) اۆتوموبيل جولدارىن رەكونسترۋكتسيالاۋ بارىسى تۋرالى باياندالدى. وسى تۇستا پرەمەر-مينيستر شىعىس قازاقستان جانە الماتى وبلىستارىنىڭ جولدارىنداعى قۇرىلىس جۇمىستارىنىڭ قارقىنىن ارتتىرۋدى تاپسىردى. راس, بۇل باعىتتارداعى جۇمىستىڭ سىلبىر ەكەندىگىن «قازاۆتوجول» ۇك» اق وكىلدەرى دە مويىنداعان. بۇل رەتتە ۇكىمەت باسشىسى قۇرىلىپ جاتقان كولىك ينفراقۇرىلىمىنىڭ ساپاسىن قامتاماسىز ەتۋدىڭ جانە ونى ۋاقتىلى پايدالانۋعا بەرۋدىڭ ماڭىزدىلىعىن اتاپ ءوتتى.

سونىمەن قاتار اياگوز اۋدانىندا ا.مامين KAZ Minerals Aktogay جشس كەڭەيتۋ جوباسىمەن تانىستى. بيىل ءسۋلفيدتى كەندى وڭدەيتىن اقتوعاي ءىى بايىتۋ فابريكاسىنىڭ قۇرىلىسىن اياقتاۋ جوسپارلانعان. ينۆەستيتسيا كولەمى 514,6 ملرد تەڭگەنى (1,2 ملرد دوللار) قۇرايدى. بەلگىلى بولعانداي, 1 مىڭ جاڭا جۇمىس ورنى قۇرىلادى. جوبانى ىسكە اسىرۋ 2022-2027 جىلدارى كاسىپورىن وندىرەتىن مىس كولەمىن جىلىنا 125 مىڭ توننادان 200 مىڭ تونناعا دەيىن ۇلعايتۋعا جانە كەنىشتى الەمدەگى ەڭ ءىرى كەن ورىندارىنىڭ قاتارىنا شىعارۋعا مۇمكىندىك بەرەدى. اقتوعاي كەن ورنىندا وكسيدتى كەندەردى قايتا وڭدەۋ كەشەنى دە جۇمىس ىستەيدى, وندا 2024 جىلعا دەيىن جىل سايىن 20 مىڭ توننا كاتودتى مىس ءوندىرۋدى قامتاماسىز ەتۋ جوسپارلانىپ وتىر.

ساپار بارىسىندا ۇكىمەت باسشىسى گلۋبوكوە اۋدانىنىڭ سولنەچنوە اۋىلىندا «مايلى داقىلداردىڭ تاجىريبەلىك شارۋاشىلىعى (مدتش)» جشس تاۋارلى ءسۇت فەرماسىن, ەگىس القاپتارىن جانە اۋىل شارۋاشىلىعى تەحنيكالارىن دا قاراپ شىقتى.

بىلتىر تاۋارلى ءسۇت فەرماسى 13 مىڭ توننا ءسۇت جانە 300 توننا سيىر ەتىن ءوندىردى. ءوندىرىستى جاڭعىرتۋ اياسىندا 2022-2025 جىلدارى جالپى ءسۇت ساۋدى تاۋلىگىنە 40 توننادان 100 تونناعا دەيىن ارتتىرۋ جوسپارلانۋدا. ايتا كەتسەك, مدتش – رەسپۋبليكاداعى الدىڭعى قاتارلى تۇقىم ءوسىرۋ شارۋاشىلىقتارىنىڭ ءبىرى. وتكەن جىلى اۋىل شارۋاشىلىعى داقىلدارىنىڭ تۇقىمدارىن ساتۋ بويىنشا سەرىكتەستىك 1-ورىنعا يە بولدى (10 مىڭ توننا تۇقىم). سوڭ­عى بەس جىلدا بارلىق وسىرىلەتىن اۋىل شارۋا­شىلىعى داقىلدارى بويىنشا ورتاشا ونىمدىلىك گەكتارىنا 4,3 توننانى قۇرادى. كاسىپورىن سولنەچنوە اۋىلىندا جالپى اۋدانى 3,7 مىڭ شارشى مەتر از قاباتتى تۇرعىن ۇيلەر كەشەنىن سالۋ ارقىلى «اۋىل – ەل بەسىگى» جوباسىن ىسكە اسىرۋعا بەلسەندى قاتىسىپ كەلەدى.

پرەمەر-مينيستر سەمەي قالاسىندا دا بولدى. مۇندا Qazaq astyq group جشس ماي ەكستراكتسيالىق زاۋىتىنىڭ كۇنباعىس تۇقىمىن قايتا وڭدەۋ جەلىسىن ىسكە قوستى. ينۆەستيتسيانىڭ جالپى سوماسى 13 ملرد تەڭگەنى قۇرايدى. كاسىپورىن تاۋلىگىنە 1 مىڭ توننا كۇنباعىس تۇقىمىن نەمەسە 800 توننا راپس تۇقىمىن قايتا وڭدەۋگە قاۋقارلى. جاڭا ىسكە قوسىلعان كاسىپورىندا 300-دەن استام تۇراقتى جۇمىس ورنى اشىلدى. زاۋىت ەلىمىزدىڭ وسىمدىك ما­يىنا دەگەن ىشكى قاجەتتىلىگىن قامتاماسىز ەتىپ عانا قويماي, ونىمدەرى سىرتقى نارىققا دا ەكسپورتتالماق.

بۇدان كەيىن ا.مامين «سەمەي قالاسىنىڭ يادرولىق مەديتسينا جانە ونكولوگيا ورتالىعىنا» باردى. اتالعان ورتالىق قازاقستانداعى راديوفارمپرەپاراتتار وندىرۋدەن جانە ونى ونكولوگيالىق اۋرۋلاردى ەرتە دياگنوستيكالاۋ­دا قولداناتىن, پاتسيەنتتەرگە راديونۋكليدتىك تەراپيا جۇرگىزۋگە دەيىنگى تولىق تسيكلدى يادرو­لىق مەديتسينانىڭ جالعىز مەديتسينالىق مەكە­مەسى. 

ۇكىمەت باسشىسى سونداي-اق قازاقستاندا ال­عاش رەت بالالار مەن ەرەسەكتەردى وڭالتۋ تەحنو­لوگياسى – h/p/cosmos locomotion قولدا­نىلعان iv plus كلينيكاسىنىڭ قىزمەتىمەن تانىستى. ول اعزانىڭ فيزيولوگيالىق جانە مو­تور­لىق فۋنكتسيالارىن قاداعالاۋدىڭ ەلەك­تروندىق جۇيەلەرىن پايدالاناتىن تسيفرلى پلات­­فورماداعى ەلىمىزدەگى العاشقى مەديتسي­نا­لىق وڭالتۋ ورتالىعى ەكەنىن ەسكە سالا كەتەيىك.

جالپى, شىعىس قازاقستاننىڭ ەكونوميكاسىندا ىلگەرىلەۋ بار. بيىلعى ءتورت ايدىڭ قورىتىندىسى بويىنشا وبلىستا ونەركاسىپ ءوندىرىسىنىڭ كولەمى 2020 جىلدىڭ وسى كەزەڭىمەن سالىستىرعاندا 6,7%-عا – 860,8 ملرد تەڭگەگە دەيىن ءوستى. اۋىل شارۋاشىلىعىنىڭ جالپى ءونىمىنىڭ كولەمى 93,8 ملرد تەڭگەنى (+2,1%), قۇرىلىس جۇمىستارىنىڭ كولەمى – 51,6 ملرد تەڭگەنى (+5,6%) قۇرادى. نەگىزگى كاپيتالعا سالىنعان ينۆەستيتسيالار 177,6 ملرد تەڭگەگە جەتتى (+6,8%).

ۇكىمەت باسشىسىنىڭ شىعىسقا جاساعان جۇمىس ساپارىنا وبلىس اكىمى دانيال احمەتوۆ, يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆ, اۋىل شارۋاشىلىعى ءمينيسترى ساپارحان وماروۆ, قارجى ءمينيسترى ەرۇلان جاماۋباەۆ, دەنساۋلىق ساقتاۋ ءمينيسترى الەكسەي تسوي جانە توتەنشە جاعدايلار ءمينيسترى يۋري يلين قاتىستى. 

شىعىس قازاقستان وبلىسى