اتىشۋلى Astana LRT ءىسى بويىنشا سوت ۇكىمى 28 مامىر كۇنى شىعادى. نۇر-سۇلتان قالاسىنىڭ ماماندىرىلعان اۋدانارالىق قىلمىستىق سوتىنىڭ سۋدياسى قاجىمۇقان مەكەمتاس بۇگىن ايىپتالۋشىلارعا سوتتاعى سوڭعى ءسوزىن ايتۋعا مۇمكىندىك بەردى, دەپ حابارلايدى Egemen.kz.
ونلاين وتىرىستا نۇر-سۇلتان قالالىق ءماسليحاتىنىڭ بۇرىنعى حاتشىسى جانات نۇرپەيىسوۆ, جولاۋشىلار كولىگى جانە اۆتوموبيل جولدارى باسقارماسىنىڭ بۇرىنعى باستىعى ءراشيد امانجولوۆ, «Astana Innovation» اق ەكس-باسقارما توراعاسى تالعات ءاشىم, «نۇر-ترەيد» سەرىكتەستىگىنىڭ بۇرىنعى ديرەكتورى ۋلۋگبەك اچيلوۆ جانە مەردىگەر كومپانيانىڭ باسشىسى تيمۋر قاساباەۆ ءسوز الدى.
سونىمەن بىرگە, سەرىكتەس كومپانيالاردىڭ قىزمەتكەرلەرى دۋلات مۋسەنوۆ جانە داۋرەن ءابدىحاميتوۆ تا سوڭعى ءسوزىن ايتى. ەشقايسىسى تاعىلعان ايىپتار بويىنشا كىناسىن مويىندامادى.
ەستەرىڭىزگە سالساق, سوتقا جەتى ادام تارتىلعان. ولارعا جەڭىل رەلستى كولىك جەلىسىن جوبالاۋ كەزىندە 5,8 ميلليارد تەڭگەنى جىمقىرۋعا سەپتەستى, نەمەسە سەنىپ تاپسىرىلعان قارجىنى بەيبەرەكەت جۇمسادى دەگەن ايىپ تاعىلىپ وتىر.
بۇعان دەيىن پروكۋرور كەي ايىپتالۋشىنى 7, ال وزگەلەرىن 11 جىلعا دەيىن باس بوستاندىعىنان ايىرۋدى سۇراعان.
ال, قارجىنى جىمقىرۋدىڭ جۇيەسىن قۇرعان Astana LRT كومپانياسىنىڭ بۇرىنعى باسشىسى تالعات اردان جانە ەلوردا اكىمىنىڭ بۇرىنعى ورىنباسارى قانات سۇلتانبەكوۆ حالىقارالىق ىزدەۋدە.