ءساۋىردىڭ سوڭعى كۇندەرىندە استاناداعى بەيبىتشىلىك جانە كەلىسىم سارايىندا “ەۋرازيا: مادەنيەتتەر جانە ۇرپاقتار ۇنقاتىسۋى” اتتى حالىقارالىق فورۋم وتەدى.
وسى شارا الدىندا جۋرناليستەر وداعىنىڭ ءباسپاسوز كلۋبىندا جۋرناليستەرگە ارنالىپ بەرىلگەن باسپاسوز ءماسليحاتىندا جازۋشىلار وداعىنىڭ توراعاسى نۇرلان ورازالين حالىقارالىق ەۋرازيا ۇنقاتىسۋى تۇعىرناماسىنىڭ دۇنيەگە كەلۋى تاريحىنان ءسوز قوزعادى. 1998 جىلى زيالىلاردىڭ باستاماسىمەن قۇرىلعان بۇل ۇيىمنىڭ باستى ماقساتى – ەۋرازيا قۇرلىعىنداعى حالىقتاردىڭ ءوزارا ۇنقاتىسۋىنا قول جەتكىزىپ, ۇلتتار مەن ۇلتتاردىڭ, مادەنيەتتەر مەن مادەنيەتتەردىڭ اراسىن جاقىنداتۋ, ولاردىڭ بەيبىتشىلىكتە ءومىر ءسۇرۋىن قامتاماسىز ەتۋ.
جالپى, كونە وركەنيەتتەر توعىسىندا تىرشىلىك ەتكەن كوپتەگەن حالىقتاردىڭ مول مادەنيەتى, تىلدەرى مەن دىندەرى قاتار ءجۇرىپ, الەمدىك تاريح پەن مادەنيەتتىڭ اسىل جاۋھارلارىن تىزگەن ەۋرازيا دۇنيەسىن قۇردى. ءبىز وسى ءۇنقاتىسۋ ارقىلى ءبىر-بىرىمىزبەن ۇعىنىسىپ, يىعىمىزدى تاقاپ وتىرىپ, شىنتاعىمىزدى سەزىنگىمىز كەلەدى. وسى جەر شارىندا بىرگە تىرشىلىك ەتۋدى بۇيىرتقان ادامزات بالاسى ءدىني نانىم-سەنىم, ساياسي كوزقاراستار, مادەنيەتتەر, يدەولوگيا قالىپتاستىرعان قاشىقتىقتى جاقىنداستىرۋ ماقساتىندا بىرلەسە قيمىلداپ, بۇكىلعالامدىق ۇيلەسىمگە ۇمتىلساق كەرەك-ءتى, دەگەن جازۋشى ۇنقاتىسۋ اياسىنىڭ جىلدان جىلعا كەرەگەسىن كەڭەيتىپ كەلە جاتقانىن ايتتى.
سەناتور عاريفوللا ەسىم ءاربىر حالىقتىڭ ءوز مادەنيەتى بار, ال حالىق سول مادەنيەتى ارقىلى ەرەكشەلەنىپ, دارالانىپ تۇرادى. حالىقتى حالىق قىلىپ تۇراتىن دا سول مادەنيەت. ال مادەنيەتتەر ۇنقاتىسۋىندا وسى دارالىقتى جويىپ الماي, ءبىر-ءبىرىنىڭ مادەنيەتىن قادىرلەي وتىرىپ ۇنقاتىسۋدىڭ ماڭىزى زور, دەي كەلىپ, فورۋمدا قوزعالاتىن اڭگىمەنىڭ ءبىر وزەگى وسى بولاتىنىن ايتتى. ەكىنشى ماسەلە–ۇرپاقتار اراسىنداعى تۇسىنىستىك. اعا بۋىننىڭ قاسيەتتەگەن قۇندىلىعى مەن بۇگىنگى جاڭا مىڭجىلدىقتاعى وسكەلەڭ بۋىننىڭ قادىرلەر قاسيەتتىسى نە, وسى ەكى ارادا ۇعىنىسۋعا قالاي جەتەمىز دەگەن ساۋال دا فورۋمعا جينالعانداردىڭ قاپەرىندە بولاتىنىن ايتقان سەناتور اڭگىمەنىڭ تەرەڭ جۇرەتىندىگىنە كۇمانىمىز جوق, سەبەبى, وعان 16 مەملەكەتتىڭ مىقتى زيالىلارى قاتىسقالى وتىر دەدى.
ەۋرازيا ۇنقاتىسۋى تۇعىرناماسىنىڭ ەشقانداي ەكونوميكالىق ماقسات قويمايتىنىن, ساياسي ءبىر مۇددەگە باعىتتالماعانىن ايتقان ساليح اكچاي ادامزات ءۇشىن ۇلتىنا, دىنىنە, تۇرىنە قاراماستان, سول حالىقتىڭ, سول مادەنيەتتىڭ بار ەكەنىن ۇعىنىپ, قابىلداۋ اسا ماڭىزدى. سوندىقتان ءبىزدىڭ العا قويعان ماقساتىمىز سول مادەنيەتتەردى قولداۋدى, قورعاۋدى جۇزەگە اسىرىپ, ونىڭ جوعالىپ, جويىلىپ كەتۋىنە جول بەرمەۋ, دەدى جانە ءساۋىردىڭ 28-29-ى كۇندەرى بولاتىن فورۋمعا قاتىسۋعا شاقىردى.
انار تولەۋحانقىزى.